Ir en tren a Madrid desde Lugo levará 4 horas e 46 minutos, o doble que desde Ourense

Sen concretar aínda a data exacta en que se producirá o fito da chegada da Ave a Ourense en decembro, Renfe puxo este luns en valor o tempo que aforrarán os viaxeiros que se despracen a Madrid: entre 54 minutos e unha hora e 28. Fíxoo un día despois de que a Xunta avisase ao Goberno central de que non dará "por cumprido o compromiso" da Ave galego en tanto non circulen pola comunidade os trens de alta velocidade de ancho variable, isto é, os Talgo Avril, homologados para alcanzar os 330 quilómetros por hora.

Nun comunicado, a operadora ferroviaria aclarou que estas máquinas chegarán no marco dunha "segunda fase, prevista para o próximo verán". Entón, o desprazamento á capital española acurtarase noutros 20 minutos. Segundo a empresa pública, estes trens —Talgo da serie 106, que foron adxudicados en novembro de 2016— xa están a rodar en fase de probas, de modo que as proxeccións apuntan que comezarán a operar na comunidade a partir da segunda metade de 2022.

Ata entón, o máis inmediato é a mellora que se producirá en decembro, unha vez finalizadas as obras da liña ata Ourense. Na recta final do ano, o traxecto a Madrid completarase en dúas horas e cuarto, unha hora e 28 minutos menos que agora. Mentres, os trens de Vigo e Pontevedra gañarán competitividade cun aforro de 54 minutos, que será de ata 1.04 horas na conexión Santiago– Madrid, que se completará en 3.20 horas. Quen se suban ao tren na Coruña evitaranse 1.30 horas de viaxe con respecto aos tempos actuais, en tanto que no traxecto desde a estación lucense economizaranse 57 minutos.

A pesar da mellora, seguen pesando moito as deficiencias da rede interna en Galicia e o feito de que os trens poden circular, como moito, a 250 quilómetros por hora (os Avant) debido a que a vía interna é de ancho ibérico mentres que o percorrido entre a Meseta e a cidade das Burgas conta con ancho internacional. Por iso é polo que, ademais de esixir fondos para modernizar o trazado galego nos orzamentos de 2022, a Xunta urxa a que entren en operación os Avril de ancho variable.

Evidentemente, isto resta atractivo ao ferrocarril como medio de transporte desde algúns puntos da xeografía. Así, en decembro un lucense seguirán tardando máis do dobre que un ourensán en pisar chan madrileño: 4.46 horas, fronte a 2.15. Agora son 5.43 horas desde Lugo fronte a 3.43 desde Ourense. En avión, basta cunha hora e cuarto desde a terminal de Santiago para chegar á capital.