Os delitos contra a liberdade sexual aumentaron máis dun 20% con máis de 1.200 expedientes incoados en 2018, informou este luns o fiscal superior de Galicia, Fernando Suanzes.
O titular da Fiscalía de Galicia destacou tamén o incremento dos relacionados co narcotráfico e con accidentes de tráfico por consumo de drogas na súa entrega do documento ao presidente do Parlamento autonómico, Miguel Santalices, segundo un comunicado.
O informe mostra un descenso de 7 % de asuntos de carácter penal que suman uns 103.000 e un incremento de case 9 % de pendentes nos xulgados a finais de 2018, ano en que se rexistrou unha folga de persoal do sistema xudicial que repercutiu na resolución deses temas.
O documento, que será examinado polos deputados do Parlamento galego, pon de manifesto que en 2018 houbo unha media de tres novas denuncias de carácter sexual diariamente nos xulgados desta comunidade.
Segundo o documento, as denuncias de agresión sexual o ano pasado foron un 12% superiores ás presentadas en 2017 e as de abusos sexuais incrementáronse un 40%.
A memoria da Fiscalía tamén subliña que a violencia de xénero por parte de menores aumentou de xeito "preocupante" pasando de cinco "casos en 2014 a 40 rexistrados en 2018".
Ademais, apunta a persistencia de elevadas "cifras" de violencia machista, "sen que se poida constatar unha diminución en número de vítimas", que foron máis de 6.000 o ano pasado.
Os órganos xudiciais galegos rexistraron máis de 6.500 denuncias de violencia machista o ano pasado e ditaron máis de 1.300 ordes de protección de vítimas.
O informe, que contabiliza a totalidade de denuncias ante as autoridades xudiciais galegas en 2018, "a pesar dos avances na loita contra o narcotráfico", o ano pasado houbo máis de mil novas denuncias, un 7 % de aumento respecto ao anterior.
Outros dos asuntos que destacan por volume é o da seguridade nas estradas e outras vías de comunicación con vehículos, con máis de 5.300 decisións xudiciais, e que "continúan aglutinando aproximadamente un terzo dos delitos sentenciados en Galicia".
Do total de sentenzas relacionadas coa condución de vehículos, "seis de cada dez foron por conducir baixo os efectos de alcol ou drogas", segundo a Fiscalía.
O documento constata un descenso de 7% dos asuntos de carácter penal en xeral, entre os que figuran tamén unha baixado de 13,46% dos relacionados con corrupción política, económica ou social, pasando de 156 en 2017 a 135 o ano pasado.
