Unha muller foi atopada sen vida na tarde deste martes tras declararse un incendio na cociña da súa vivenda en Santa Comba. Segundo informa o 112 Galicia, eran sobre as seis da tarde cando un particular chamou para alertar das chamas e indicar que había unha persoa no interior do inmoble, situado no lugar da Illa.
Tras o aviso, a central de urxencias activou un operativo con Urxencias Sanitarias de Galicia-061, cos bombeiros de Santa Comba, a Garda Civil, a Policía Local e Protección Civil.
Os bombeiros deron por extinguidas as lapas pasadas as 18.15 horas. A muller, que estaba sentada preto da cociña —estancia na que se declarou o lume—, foi atopada falecida polos servizos de urxencias desprazados.
