Dúas persoas tiveron que ser trasladadas polos servizos sanitarios este domingo como consecuencia dun incendio que se produciu nun ático dun edificio de catro pisos na localidade de Ponteareas e que se orixinou por unha pota que quedara ao lume. A cociña queimouse por completo e o resto da vivenda resultou afectada polo fume.
Segundo informa a central de urxencias do 112, o edificio está situado na rúa Esperanza e trasladouse a alerta ao redor das 11.30 horas, por mor da chamada dun particular a Emerxencias de Galicia. Ata o lugar desprazáronse os servizos sanitarios de urxencia e os bombeiros de Ponteareas, que informaron de que o lume se orixinou na pota que quedara ao lume.
Efectivos da Policía Local e de Protección Civil tamén se desprazaron ao lugar. Os bombeiros de Vigo foron alertados por se fose precisa a súa intervención.
