Arenal, Estrella Galicia e a Naviera Mar de Ons son as empresas mellor valoradas nos Premios Benfeito de Consumo que entrega a Unión de Consumidores de Galicia (Ucgal). A entidade entregou este xoves os seus galardóns nunha gala celebrada en Santiago de Compostela na que puxo en valor ás empresas que contribúen ao progreso socioeconómico da comunidade.
Na categoría de Produtos Alimenticios, a competición estivo disputada con finalistas como Gadis, Estrella Galicia, Clun, Pescados Rubén e Aceites Abril. Finalmente, Estrella Galicia fíxose co galardón, que entregou o delegado do Goberno, Pedro Blanco, e a presidenta de Ucgal, Rocío Arnoso.
O delegado do Goberno en Galicia destacou o traballo das empresas galegas e a "enorme calidade" dos produtos e servizos que comercializan, en declaracións aos medios de comunicación presentes no acto.
Na categoría de Servizos, empresas destacadas como Be One Ximnasios e Pousadas de Compostela competiron cunha ampla gama de entidades que prestan servizos como os bancarios (Caixa Rural Galega), de transporte (Naviera Mar de Ons) e de subministración eléctrica (Nosa Enerxía S.C.G). O premio, entregado pola alcaldesa de Santiago, Goretti Sanmartín, recaeu na Naviera Mar de Ons.
En canto aos Produtos Non Alimenticios, competían Automóviles Louzao, Jesús Babío, Adolfo Domínguez, Droguerías Arenal e Addomo Arquitectura Modular. Arenal foi recoñecida pola "súa constante innovación e oferta diversificada". O premio foi entregado polo director xeral de Comercio e Consumo, Manuel Heredia. O evento tamén contou coa entrega de dúas "mencións especiais" ao Mercado de Abastos de Santiago e a Adegas Algueira pola "súa excelencia" e "impacto positivo no territorio".
