A declaración da muller de 93 anos que denunciou á Xunta por un presunto caso de acoso inmobiliario foi este mércores suspendida pola ausencia do letrado do subdirector de Patrimonio da Consellería de Facenda, P.J.M.P. A comparecencia estaba prevista para as once e media desta mañá, pero finalmente o titular do xulgado de instrución número dous decidiu aprazar a testifical debido á ausencia do avogado do subdirector, coinvestigado nesta causa, xunto á secretaria xeral técnica de Patrimonio.
Tal e como indicaron fontes consultadas, a declaración atrasarase finalmente ata o 13 de decembro, despois de que pasen por sede xudicial os cargos da Xunta investigados así como o outro inquilino do inmoble, o edificio da antiga Cámara da Propiedade Urbana de Ourense. En concreto, a declaración dos dous cargos de Facenda está fixada para o día tres de decembro, despois de que se suspendese tamén, neste caso pola folga da Xustiza, mentres que o outro inquilino deberá acudirse por estes mesmos feitos, ao día seguinte.
O caso saltou por mor das queixas expostas pola veciña quen denunciou deficiencias no edificio, relacionadas coa falta de mantemento do ascensor e de limpeza, ata o punto de que na actualidade reside nun hotel. En concreto, o fiscal xefe acusa aos dous funcionarios de extralimitarse nas súas funcións ao adoptar medidas "non amparadas en dereito, con abandono consciente e manifesto das obrigacións" co ánimo de forzar "e dobregar a vontade dos arrendatarios, para que abandonasen o edificio ou aceptasen un acordo".
De feito, alude a deficiencias "moi graves" relacionadas coa falta do mantemento do ascensor, que continúa sen funcionar a día de hoxe, e da limpeza, o que obrigou á inquilina a residir nun hotel debido ás súas dificultades de mobilidade.
