O Consello Galego de Colexios de Aparelladores e Arquitectos Técnicos de Galicia demanda á Consellería de Medio Ambiente, Territorio e Vivenda que a futura Lei de Arquitectura facilite a participación das pequenas e medianas empresas no ámbito da contratación pública.
Segundo explican nun comunicado, a súa solicitude conseguiríase a través da división do contrato en lotes, tal e como reflicte a Lei de Contratos do Sector Público (LCSP), que introduce este requisito entre as medidas de apoio ás pemes no referente a simplificación do procedemento e redución de cargas administrativas.
O Consello Galego aconsella que a nova lei galega siga a pauta da LCSP, que "consolida –explican– a regra xeral de división do contrato en lotes, sendo excepcional a súa contratación conxunta, o que facilita o acceso á contratación pública a un maior número de empresas".
Ademais, os aparelladores galegos recomendan tamén que a nova norma priorice os aspectos cualitativos (da arquitectura) sobre o prezo ou custo dos concursos de ideas e a redacción de proxectos que se liciten".
O Consello Galego de Colexios de Aparelladores entende que "a arquitectura no seu conxunto debe considerarse un ben de interese xeral que debe ser preservado, difundido e fomentado polos poderes públicos".
Por iso, asegura os aparelladores que "a arquitectura de calidade non debe ser definida só pola estética e funcionalidade, senón tamén pola súa contribución á calidade de vida, á economía circular do proceso e ao desenvolvemento sostible de cidades e áreas rurais".
