Un novo cadáver de balea apareceu varado na costa galega. Neste caso trátase dun exemplar duns seis metros de lonxitude, cuxo corpo foi achado este mércores na praia coruñesa de Bens.
Os expertos da Coordinadora para o Estudo dos Mamíferos Mariños (Cemma) recolleron mostras para identificar o tipo de cetáceo que é, aínda que o seu avanzado estado de descomposición podería dificultar as análises.
Trátase da sétima balea que aparece morta en Galicia en menos dun mes, tras o achado de catro adultos e dúas crías.
GOLFIÑOS MORTOS EN BAIONA. Na costa de Baiona apareceron este xoves outros dous cetáceos varados, aínda que neste caso trátase dun golfiño común e unha marsopa que apareceron mortos nas rochas.
Un equipo do Cemma desprazouse ata o lugar para realizar análise e determinar, así, a causa das mortes.
