O Ministerio de Transportes rebaixará con carácter xeral un 0,11% as tarifas das autoestradas dependentes do Estado a partir do 1 de xaneiro de 2021, segundo informou nun comunicado. Hai, con todo, tres vías nas que se aplicará unha subida, entre elas a Autoestrada do Atlántico (AP-9), onde as tarifas se encarecerán un 0,92%.
As outras dúas vías nas que se elevarán os prezos son a AP-7 entre Alacante e Cartaxena, cun incremento do 0,89%, e a AP-6 de Villalba a Adanero, cuxas tarifas variarán un 0,74%. O ministerio explica que nestes casos os encarecementos responden a que, ás reducións aplicadas, hai que engadir subidas graduadas previstas anteriormente para financiar custos relacionados con excesos de valoración de expropiacións, execución de obras ou financiamento de bonificacións de peaxe, así como para compensar a non aplicación de incrementos de tarifas inicialmente previstas.
En contraste, a partir do 1 de xaneiro, ás actuais tarifas das autoestradas dependentes do Estado aplicaráselles unha rebaixa do 0,11% con carácter xeral, aínda que, pola evolución dos tráficos respecto dos previstos, a redución será dun 0,08% na AP-66 (Campomanes-León), AP-68 (Bilbao-Zaragoza), AP-2 (Zaragoza-Mediterráneo) e AP-7 entre La Jonquera e Tarragona.
Polo demais, na actualización tarifaria non se inclúen as autoestradas xestionadas por Seittsa, para as cales seguen vixentes os importes aprobados polo acordo do Consello de Ministros do 14 de decembro de 2018.
