A Confederación de Anpas Galegas informou este luns de que rexistrou un escrito dirixido ao conselleiro de Educación, Román Rodríguez, no que esixen que "rectifique o calendario escolar" e leve "a derradeira avaliación do curso máis aló do 21 de xuño" co obxectivo de impedir "que o alumnado galego da Eso perda un mes de curso".
Nun comunicado, a entidade explica que o calendario escolar, aprobado no seu día "unilateralmente" polo departamento autonómico, tiña como "única finalidade dar tempo" para poder celebrar en xuño a convocatoria extraordinaria de Eso, con 15 días reservados "para preparala". Con todo, o ministerio decidiu suspender esta proba xa en 2022 e, a pesar diso, Educación mantén a avaliación do terceiro trimestre "a principios de xuño" cando a actividade lectiva "esténdese ata o día 21" dese mes.
Por iso, recalca que as familias non están dispostas a que Educación "roube case un 10% de curso" para cadrar "as contas administrativas" e censura que Rodríguez desatendeu as súas peticións de atrasar "as avaliacións atei despois da finalización do curso escolar, ou sexa, despois do 21 de xuño", opción que propuña "para poder aproveitar todos os días lectivos como días útiles".
Ao mesmo tempo, a Confederación critica que, "a piques de rematar o primeiro trimestre", están aínda "sen definir" os "apoios e reforzos para o alumnado que o precise".
