A formación nacionalista Anova decidiu este mércores non concorrer ás eleccións xerais do próximo novembro ao ser imposible chegar a un acordo de coalición con Unidas Podemos.
Do mesmo xeito que sucedeu nas negociacións de face aos comicios estatais do pasado abril, os de Xosé Manuel Beiras decidiron volver dar un paso atrás e non presentarse ao non ser “posible” unha fronte ampla que dese continuidade ao proceso de acumulación de forzas iniciado no 2012 con AGE.
“Anova non contribuirá nas eleccións estatais ao proceso de atomización da esquerda” xa que non fose posible garantir unha única papeleta do espazo de ruptura en Galicia.
Desde Anova recordan que a pesar de que intentaron chegar a un acordo coas forzas progresistas da esquerda, “non houbo resposta positiva para armar unha nova fronte ampla”.
O obxectivo agora, remarcan, é traballar para conseguir esta unión de forzas de face as eleccións autonómicas de 2020 para impedir unha nova maioría absoluta do PPDEG en Galicia.
EN MAREA. A dirección de En Marea, logo de non alcanzar un acordo de coalición con ningunha das forzas soberanistas de Galicia para concorrer unidas ás eleccións de novembro, reunirase proximamente para decidir a fórmula para actuar.
O obxectivo de En Marea era conformar unha candidatura única de forzas progresistas galegas na que pretendían sumar a forzas como Anova, Compromiso por Galicia e o BNG.
Buscaban deste xeito conseguir unha axenda política propia no Congreso e, ao tempo, desenvolver unha axenda social e democrática que atenda ás urxencias da Comunidade.
Así o intentaron ata o límite de prazo que concluíu ás 14 horas pero, finalmente, o BNG concorrerá en solitario e Anova decidiu non participar nas eleccións xerais.
Mentres tanto, En Marea reunirá aos seus órganos de dirección para tomar unha decisión sobre a concorrencia xa que o prazo para que os partidos formalicen as súas listas ante as xuntas electorais conclúe o luns 7 de outubro ás doce da noite.
Desde o BNG, cren que Villares "busca construír" un "relato". Pontón tacha de política "de circo" a proposición do de En Marea, que antes apelara ao Bloque a negociar unha candidatura con Anova e CxG.
