"Andrea non chegaría a esta situación se o seu hospital tivera Paliativos"

O presidente da Sociedade Española de Coidados Paliativos (Secpal), Álvaro Gándara, afirmou este mércores que se no hospital onde está ingresada Andrea existise unha unidade de paliativos "non se chegaría a esta situación" porque se realizou un traballo previo e alcanzouse un consenso coa familia.

Durante a súa intervención nun acto con motivo do Día Mundial dos Coidados Paliativos que se celebra o próximo 10 de outubro, Gándara referiuse ao caso da nena galega que padece unha enfermidade dexenerativa irreversible e para a que os seus pais reclamaron unha morte digna e a retirada da alimentación artificial, algo que saíu adiante.

"En Madrid hai entre 80 e 100 casos cada ano de nenos que morren atendidos por estes equipos -de coidados paliativos pediátricos- e que eu saiba non transcenderon nunca á prensa e trátanse dun xeito eficaz", manifestou Gándara.

O presidente da Secpal asegurou que se Andrea fose atendida nunha unidade de coidados paliativos faríase un traballo previo, coa retirada de tratamentos non útiles, e chegaríase a un consenso coa familia, co equipo, e non se produciría esta situación, "estou convencido", subliñou.

Sinalou que en España tan só existen catro unidades de coidados paliativos pediátricos; en Madrid, Barcelona, Canarias e Baleares, mentres que en Sevilla inaugurarase outro en breve.

Gándara avogou por crear unha rede de Unidades de Coidados Paliativos Pediátricos -dado que son poucos os nenos que requiren esta atención- e que cada autonomía conte, polo menos, cun centro de referencia.