Un conflito polos 'marcos' dunha leira volveu desencadear un episodio violento entre persoas maiores en Galicia. Ocorreu na tarde deste domingo nunha aldea do municipio coruñés de Cerceda, onde, segundo relatou a Garda Civil a AGN, un octoxenario "ameazou cunha arma branca, que pola descrición podería corresponderse cunha katana, a outro home de avanzada idade, que á súa vez respondeu cunha vara". O resultado: "ambos están investigados por agresión, aínda que non chegaron a ser detidos" porque a escena, máis propia dun filme de Tarantino que do rural galego, non tivo maiores consecuencias máis aló dalgún rasguño.
Ata o lugar do sucedido, na parroquia de Rodís, desprazouse unha patrulla de axentes do posto da Garda Civil de Ordes, que á súa chegada procederon a acougar os ánimos entre os dous anciáns, aínda que xa deixaran de agredirse. Non tardaron en saber o motivo: "uns marcos, como pasa moi habitualmente".