Corpos de seguridade e urxencias participaron este xoves nun operativo no municipio coruñés de Mugardos tras o achado do cadáver dunha persoa na ensenada de Santa Lucía, na franxa litoral do municipio.
O 112 Galicia comunicou que o corpo foi recuperado da auga na tarde desta mesma xornada. Salvamento Marítimo, Garda Civil e Policía Local mugardesa tomaron parte no despregamento, ao que se sumou o Grupo de Urxencias Supramunicipal da vila.
A agrupación local de Protección Civil e persoal sanitario completaron as tarefas na zona, situada na marxe sur da ría de Ferrol.
O alcalde de Mugardos, Juan Domingo de Deus, afirmou que o corpo se corresponde cunha "persoa maior de 70" anos de idade. Ademais, indicou que o achado se produciu "sobre as 14:30 horas" no varadero de Santa Lucía, nas inmediacións da igrexa da parroquia de Mehá.
"Estaba a desamarrar o seu pequeno bote, pero a causa descoñécese", apuntou o edil.
Así mesmo, desvelou que se achegou á zona do suceso minutos logo de producirse. Segundo o seu relato, "non parecía ter un golpe" tras unha primeira exploración, polo que a análise forense determinará as posibles causas que rodean a este incidente.