Amancio Ortega, o líder empresarial español mellor valorado pola prensa

O fundador de Inditex, Amancio Ortega, a presidenta do Banco Santander, Ana Botín, e o presidente de Telefónica, César Alierta, consolídanse como as figuras máis relevantes do mundo empresarial español para os xornalistas consultados no último estudo Kar de Ipsos.

En concreto, os xornalistas destacan de Ortega a súa visión empresarial e a confianza que inspira, mentres que da presidenta do Santander, única muller no ranking e cunha excelente evolución no ranking no ano e catro meses que leva no cargo, subliñan a súa visión internacional, influencia e popularidade.

O presidente executivo de Telefónica completa o podio de honra destacando para a prensa pola súa influencia, liderado e visión internacional.

Os presidentes de Mercadona e Inditex, Juan Roig e Pablo Isla, sitúanse no cuarto e quinto posto, respectivamente. Do primeiro executivo da cadea de supermercados valenciana destacan o seu carácter e proximidade á xente.

En Isla, que veu gañando posicións nas últimas edicións do estudo, xunto a valores como a confianza que inspira, destácase a súa visión empresarial e internacional.

Completan a lista dos empresarios máis destacados para os xornalistas españois: o presidente de BBVA, Francisco González; o presidente de ACS, Florentino Pérez; o do Grupo La Caixa, Isidro Fainé, que é o máis destacado polo seu compromiso social; o de Repsol, Antonio Brufau, e o de Iberdrola, Ignacio Sánchez Galán.

O director de Ipsos Loyalty y Public Affairs, Jesús Caldeiro, afirmou que o estudo Kar é unha ferramenta "sólida" para analizar o panorama económico e empresarial de España. "O estudo recolle a opinión de xornalistas especializados, analistas, políticos, líderes empresariais e membros do terceiro sector empresarial que achegan a súa visión tanto da situación xeral do país e a economía como da reputación das principais compañías do país", sinalou.