A deputada de En Marea no Congreso, Alexandra Fernández, censurou ao candidato de Podemos á Presidencia da Comunidade de Madrid e deputado no grupo confederal, Íñigo Errejón. Así, reprochoulle as súas declaracións sobre o pacto constitucional.
Errejón, nunha entrevista en Telemadrid, recollida por Europa Press, desculpouse coas persoas das xeracións anteriores que se sentiron "ofendidas" coas mensaxes de borrón "e conta nova" sobre o pacto constitucional de 1978 que poidan interpretar do seu partido. Neste sentido, dixo que a verdadeira proposta do seu partido era "actualizalo a 2018, non facer revisión histórica".
Este martes, na súa conta persoal de Twitter, a deputada de En Marea reprobou este pronunciamento e recordou que a formación morada, así como os principios nos que se asentan as candidaturas de confluencia, fano na "creba democrática" como impulsou o propio Xosé Manuel Beiras (Anova) como un dos referentes das candidaturas de unidade.
"Seica Podemos estaba de broma cando falaba de creba democrática. Aliñarse co discurso das elites da Transición: iso si que merecía unha desculpa, tanto co 15-M coma cos pobos que loitan por rachar os candados do R78. Van camiño de converterse no seu freo", escribiu na súa conta persoal desta rede social.
Seica Podemos estaba de broma cando falaba de creba democrática.
— Alexandra Fernández (@aKollontai) 18 de septiembre de 2018
Aliñarse co discurso das elites da transición: iso sí que merecía unha disculpa, tanto co 15M coma cos pobos que loitan por rachar os candados do R78. Van camiño de converterse no seu freo.https://t.co/AjuRXAQjpf
