O canceríxeno gas radón concéntrase moi por encima dos niveis recomendados en Galicia e o resto do territorio nacional. Así o advirte o director do Laboratorio do Radón en Galicia, Xoán Miguel Barros, que aclara que "son altos sobre todo na costa oeste da península ibérica, cunha lingüeta que comeza na serra madrileña e abarca Estremadura, Sevilla e Huelva, Castela e León, en Asturias un pouco da zona oeste, e practicamente toda Galicia".
O radón resulta da desintegración de radio e uranio. "O radio ten 1.580 millóns de anos de vida media e o uranio 4.500 millóns, así que se hai radón na vivenda ímolo a ter sempre", explica respecto diso Barros, convencido de que este gas "atópase en case todas as vivendas galegas, en torno ao 80%", o que implica que "probablemente teña radón cada un na súa".
O problema chega se se inhala ou respira o radón, xa que pode provocar cancro de pulmón
Indicou, así mesmo, que é un gas radioactivo, que "contén radiacións alfa", polo que "en contacto coa pel non resulta problemático porque as radiacións non conseguen atravesala, pero o problema chega se se inhala ou respira, xa que entón pode provocar cancro de pulmón".
PREVENCIÓN. Dentro das medidas anti-radón, existen as preventivas, que se realizan nas novas construcións; e as mitigadoras, para as xa existentes. Co propósito de evitar o radón procedente do subsolo, no proceso de construción pódese instalar unha "barreira" previa á capa de formigón, é dicir, trátase de instalar unha capa de áridos dun espesor mínimo de 10 centímetros sobre o substrato de terra. Nela colócase unha membrana xeotextil e a continuación unha membrana de polietileno de 0,4 milímetros como mínimo.
En canto ás mitigadoras, o que mellor funciona é ter un bo sistema de ventilación, xa sexa natural abrindo portas e fiestras polas mañás; ou mecánico, que consiste nun sistema de ventiladores con extractor de aire. ¿E se teño radón na miña vivenda ou posto de traballo?, é a pregunta habitual. Nese caso, conclúe o especialista, "o máis aconsellable é chamar a un laboratorio certificado e que se mida, e, por suposto, non alarmarse, xa que os efectos do radón tardan anos en producirse e mentres non haxa unhas medicións exactas tampouco se pode saber se hai radón nese edificio".
