O alcalde de Vigo, Abel Caballero, retoma a súa axenda este xoves tras suspendela o mércores debido a un contacto cun caso positivo por covid-19. O rexedor recupera a actividade tras dar negativo nunha PCR.
Caballero cancelou a súa axenda tras coñecer o contaxio dun dos seus colaboradores estreitos. Aínda que deu negativo nun test de antíxenos, por precaución "sanitaria" suspendéronse as súas actividades mentres esperaba á realización dunha PCR, segundo detallaron fontes municipais.
En concreto, canceláronse unha reunión coa alcaldesa de Vilanova i a Geltrú (Barcelona) e presidenta da Federación Catalá de Municipios e Provincias, Olga Arnau, e unha recepción aos campións do Europeo de Taekwondo.
Así mesmo, o pleno extraordinario solicitado polos grupos municipais de Vigo para reclamar "explicacións" ao goberno local tras a sentenza que ratifica a condena a un funcionario vigués por enchufar unha cuñada da concelleira e presidenta da Deputación de Pontevedra, Carmela Silva, aprazouse ata xaneiro ao non poder presidilo o alcalde.
Finalmente, a proba PCR realizada arroxou un resultado negativo, polo que o rexedor, que non chegou a presentar síntomas compatibles coa enfermidade, retomará a súa axenda este xoves.
