A empresa Albada, concesionaria da planta de reciclaxe de lixo en Nostián, anunciou que presentou esta mañá un Expediente de Regulación Temporal de Emprego (ERTE) que afectará a parte do persoal desta instalación, en folga desde o pasado 28 de xullo.
Por outra banda, a dirección de Albada indica presentar unha denuncia contra o comité por supostas irregularidades no desenvolvemento da folga que están a causar "graves prexuízos económicos á compañía".
Os traballadores de Albada manteñen unha folga indefinida desde o pasado 28 de xullo e a última mediación celebrada o martes no Comité galego de relacións laborais (Aga) terminou sen acordo.
Os traballadores non aceptan a conxelación salarial proposta pola empresa -que suporía, advirten, unha rebaixa salarial real do 16 por cento- e esixen a reincorporación de polo menos 8 dos traballadores despedidos, saídas que a dirección atribúe á caída da produción nos últimos anos e que estaría disposta a negociar sempre que non se manteña a redución fixada da masa salarial total.
Ambas as partes acúsanse de inmovilismo tras o fracaso dunhas negociacións que se prolongan xa varios meses.
Mentres proseguen as negociacións, os traballadores de Albada teñen previsto seguir coas mobilizacións e acudirán o vindeiro luns á reunión plenaria do Concello da Coruña.
Así mesmo, prevén nos próximos días reunións con sindicatos e outros comités de empresa do sector para fixar un novo calendario de mobilizacións conxuntas tras a folga da limpeza da pasada semana.
