O Ministerio de Fomento sacou a licitación tres contratos para a chegada da alta velocidade a Galicia que suman un importe total de 76,2 millóns de euros.
En concreto, a través da sociedade Adif Alta Velocidade, o Ministerio licitou a execución das obras do proxecto de construción de montaxe de vía para o tramo Pedralba de la Pradería-Campobecerros por 56 millóns de euros, segundo publica este xoves o Boletín Oficial do Estado (BOE).
Ademais, Adif licitou un contrato de execución de obras e instalacións auxiliares para a montaxe de vía no corredor norte-noroeste de alta velocidade no tramo Olmedo-Lubián-Ourense por 11 millóns. Este contrato forma parte do subtramo entre Pedralba de la Pradería-Taboadela.
Tamén Fomento sacou a licitación pública a execución de obras do proxecto de construción dun cambiador de ancho de Taboadela, a montaxe de vía no ramal de conexión da liña de alta velocidade Madrid-Galicia coa liña convencional, así como a remodelación da estación de Taboadela por 9,1 millóns.
En todos estes contratos, a oferta económica terá un peso do 60 % mentres que a técnica será do 40 %.
A entrada en servizo de novos tramos de alta velocidade será seguramente unha realidade pronto, ás portas das eleccións municipais e autonómicas de 2019. No horizonte máis próximo está previsto que entren en operación o túnel entre Atocha e Chamartín, o tramo Vandellós-Tarragona do Corredor Mediterráneo ou a liña Antequera-Granada, todos eles xa en probas.
Tamén se traballa para concluír as obras da conexión Venta de Baños-Burgos, do tramo zamorano do corredor galego e da alta velocidade a Murcia, cun proxecto de soterramento fortemente demandado.
