Un novo incendio na parroquia pontevedresa de Ponte Sampaio súmase á vaga de incendios que afecta desde o luns á provincia. Declarouse ao redor das 17.oo horas deste mércores e varias casas foron desaloxadas xa, debido á virulencia do lume, que se propaga rapidamente axudado polo forte vento. A superficie arrasada supera xa as 20 hectáreas.
En Soutomaior, ao incendio que desde o martes propagouse a Redondela e ameaza a parroquia de San Martiño de Ventosela (Redondela), súmaselle agora outro novo lume que afecta á parroquia de Arcade, onde as chamas se aproximan ao núcleo de Xunqueiriñas, o que obrigou a decretar a situación 2 de alerta. Este nivel de urxencia tamén se mantén tamén na parroquia de San Martiño de Ventosela.
Estes dous incendios, sumados aos de Cotobade ?o máis devastador, que quedou controlado este mércores?, Lérez, Caldas e Mondariz devoraron 1.200 hectáreas en Pontevedra desde o luns. A eles engádenselles os que afectan á provincia da Coruña para deixar a Galicia, e especialmente á súa fachada atlántica, nunha situación límite. En Porto do Son foron desaloxadas varias casas e un cámping, tamén houbo desaloxos nunha parroquia de Santiago e un lume devora xa máis de 20 hectáreas en Rois. Todo iso despois de que fose controlado outro en Cee que calcinou 100 hectáreas e un en Fisterra que levou por diante máis de 20.
LÉREZ, CONTROLADO. O incendio desatado a pasada medianoite na parroquia pontevedresa de Lérez foi controlado á primeira hora da tarde deste mércores, logo de calcinar unhas 30 hectáreas, segundo as primeiras estimacións de Medio Rural.
DOBRE FRONTE EN SOUTOMAIOR. En Soutomaior dous incendios ameazan a núcleos habitados. En ambos está decretada a situación 2 de alerta. O primeiro propagouse, xa desde o martes, ata Redondela, o que obrigou a desaloxar na parroquia de San Martiño de Ventosela (Redondela) a decenas de veciños e a 37 nenos dun centro de Aldeas Infantís, recolocados provisionalmente no cuartel da Brilat en Figueirido. Leva calcinadas máis de 200 hectáreas. E este mércores un novo lume ameaza ao núcleo de Xunqueiriñas, na parroquia de Arcade.
As chamas chegaron a ameazar a dúas ducias de casas en San Martiño de Ventosela e houbo que desaloxar a 40 menores do centro de Aldeas Infantís, que foron acollidos no cuartel da Brilat, en Figueirido.
.
COTOBADE, CONTROLADO. O forte vento dificultou notablemente as tarefas de extinción do lume que o luns pola tarde arrincou en Cotobade e chegou a estenderse ata a parroquia pontevedresa de Bora. Por agora devorou 365 hectáreas. Este mércores quedou controlado, segundo informa Medio Rural, e desactivouse a situación 2. Aínda que os efectivos da Ume retiráronse, os medios municipais e autonómicos seguen refrescando o incendio para evitar que se reproduza.
As chamas cercaban o martes o lugar de Vilanova, onde viven 270 veciños, dos cales polo menos a metade tiveron que se evacuados o luns pola noite. é un dos núcleos máis afectados, xunto con Tenorio, Almofrei e Xesteira.
Ademais, o Concello xa formalizou "pola vía de urxencia" a contratación de obras para repor os bens públicos afectados o incendio, como a iluminación.
O incendio de Caldas está controlado desde este mércores tras queimar 290 hectáreas. Tamén o de Mondariz tras afectar a 160
CALDAS E VILAGARCÍA. O incendio forestal iniciado o luns na parroquia de Saiar no municipio pontevedrés de Caldas de Reis quedou controlado na mañá deste mércores tras queimar unhas 300 hectáreas de superficie.
Este incendio comezara ás 15.51 horas do luns e estaba estabilizado desde as 11.45 horas do martes. Por mor deste lume, como medida preventiva, fora activada a denominada situación 2 na tarde do luns, pola proximidade do lume ao lugar de Castroagudín, no municipio veciño de Vilagarcía.
MONDARIZ. Pola súa banda, o incendio de Mondariz, que comezou ás 22.16 horas do luns na parroquia de Queimadelos, quedou controlado este mércores. Este lume afectou tamén ao municipio veciño de Ponteareas e en total calcinou 200 hectáreas.
TELÉFONO 085. A Consellería de Medio Rural recorda que está a disposición da cidadanía o número de teléfono gratuíto 085, ao que deben chamar en caso de detectar algún lume forestal.
Ademais, toda a información actualizada sobre incendios forestais poderá ser consultada na conta aberta de twitter: \<sent\>incendios085.
