O cadáver dun octoxenario en estado de descomposición foi atopado pasado o mediodía deste sábado na súa casa de Ferrol, despois de que veciños do número 38-40 da rúa San Salvador alertasen á Policía Local de que había días que non vían este home e de que da súa casa procedía un forte cheiro.
Segundo informaron a Europa Press fontes dos Bombeiros de Ferrol, foron avisados arredor das 13.00 horas do sábado para entrar na vivenda tras comprobar a Policía Local que a porta de acceso estaba pechada. Mediante un vehículo autoescala, accederon ao inmoble situado no cuarto piso por unha das fiestras. Tras inspeccionar as dependencias do piso, nunha das habitacións atoparon, tirado no chan, o cadáver de J.C.A., nacido en 1933, quen vivía só, aínda que ten familiares.
Segundo as fontes consultadas, o home levaba morto "unha boa tempada, probablemente xa pasaría dos 10 días", dado que o corpo presentaba "efectos da descomposición e estaba bastante mal". Precisamente porque o home levaba días falecido, o seu corpo foi conducido ao hospital xeral para practicarlle a autopsia.
Nas últimas semanas foron achadas mortas polo menos cinco persoas soas nos seus domicilios de Galicia.
