Máis de 80.000 persoas participaron nos espectáculos programados este verán no marco do circuíto da Xunta Cultura no Camiño, que a semana pasada puxo fin á súa novena edición tras ofrecer máis de 650 actuacións desde mediados do mes de xullo nos 164 municipios adheridos.
Nun comunicado, a Consellería de Cultura, Educación e Universidade destaca que volveu colaborar con Turismo de Galicia no desenvolvemento desta iniciativa, para a que se contou tamén co patrocinio de Gadis e que implicou a contratación de 240 formacións galegas de teatro, danza, música, circo e maxia.
A pesar das limitacións de capacidade en cumprimento das medidas sanitarias vixentes en cada momento, a Xunta resalta que a boa resposta por parte do público reforza o papel deste programa autonómico no impulso da dinamización cultural a través dunha oferta descentralizada de artes escénicas e de música, que nesta ocasión se incluíu, ademais, na colaboración do Xacobeo 21-22.
De feito, este ano rexistrouse unha marca no número de entidades locais participantes —cun incremento do 25% respecto de 2020 e máis do dobre que en 2019— e un reforzo do investimento por parte do Goberno galego como unha das medidas do plan de reactivación do sector cultural fronte aos efectos do covid-19.
Nesta novena edición, a Xunta destinou un millón de euros —un 33% máis que en 2020— a subvencionar a contratación por parte dos concellos de 240 compañías escénicas e grupos musicais de carácter profesional e con sede en Galicia. Por xéneros artísticos, ademais do teatro cunha cifra superior ás 220 funcións, destacou a forte presenza da música, con case 200 concertos; o novo circo con 130 citas; e a maxia, con centenar de actuacións.
