Uns 600 axentes da Garda Civil conformarán en Galicia o dispositivo establecido con motivo da Operación Retorno de Verán, que comeza o venres, día 31, ás 15.00 horas, e conclúe o domingo 2 de setembro, ás 00.00 horas.
Só nas estradas galegas, desde primeiros de xullo e ata este momento, rexistráronse o dobre de vítimas mortais, 21 fronte ás 10 de 2017, segundo expuxo o delegado do Goberno en Galicia, Javier Losada, nunha comparecencia ante os medios de comunicación no Centro de Tráfico do Noroeste.
Ao acto asistiron tamén a coordinadora da Dirección Xeral de Tráfico (DXT) en Galicia, Victoria Gómez, e o xefe do sector de Tráfico da Garda Civil nesta autonomía, o tenente coronel Francisco Javier Molano. Así mesmo tamén asistiu o director do Centro de Xestión de Tráfico, Ramiro Martínez.
En todo o Estado, a DXT prevé que se efectúen 4,2 millóns de desprazamentos, dos que un 10% —uns 425.000— corresponden a Galicia. Por iso, e ante as cifras de falecidos rexistrados no que vai de verán —dos que cinco eran condutores de motocicletas e tres peóns—, o delegado do Goberno en Galicia apelou á precaución dos condutores.
"Volvemos a cifras de 2016", insistiu Javier Losada, quen, incidindo na cifra de vítimas mortais, pediu "responsabilidade" e unha actuación "segura" ao volante. Respecto diso, admitiu que as estatísticas non son "boas".
CAUSAS DOS SINISTROS. Mentres, recordou que a maioría dos accidentes son por saída de vía (52%) e en estradas convencionais. En canto ás causas desta saída de vía, apuntou á distracción ao volante ou a velocidade inadecuada.
Namentres, dos 21 accidentes mortais deste verán, 20 producíronse neste tipo de vías e, destes, 4 o foron en pistas ou camiños veciñais.
"Estas cifras lévannos a pedir unha maior seguridade dos condutores", insistiu Javier Losada, quen instou en revisar o coche, manter a distancia de seguridade, non tomar alcol nin drogas e, se se fan tramos longos, descansar. Sendo preguntado polo despregamento na Operación Retorno, precisou que será "o habitual" de acordo co número de desprazamentos.
"Isto é un tema de cero alcol, cero drogas, atención ás estradas e atención nas viaxes curtas e na estrada convencionais", insistiu Losada apelando a descartar unha circulación pensando que se domina a zona". Na mesma liña, instou non utilizar o móbil para evitar distraccións.
