O Viveiro e o Ribadeo volven mirar cara arriba na clasificación de Preferente tras as súas dúbidas no arranque da segunda volta. Os ribadenses venceron por 1-0 ao Páramo e son oitavos, con 34 puntos, a só seis do Laracha, que é cuarto, mentres que o Viveiro aínda está máis preto da cuarta praza, a cinco puntos, tras vencer por 0-1 en Chantada.
O Ribadeo rompeu a súa mala serie no Pepe Barreira cun agónico triunfo ante o Páramo. Un gol de Orly, no minuto 88 do partido, foi suficiente para que os de Vilachá sumasen tres puntos que lles permiten escalar unha posición e esquecerse dos últimos paus como local.
O cadro mariñán non xogou o seu mellor partido, outra vez condicionado polo mal estado do terreo de xogo, pero foi capaz de sacalo adiante logo de moito sufrimento. O técnico valora que os xogadores cresen sempre na vitoria e cre que o premio do gol de Orly foi xusto a tenor do que sucedera durante os minutos precedentes. «Dominamos durante os 90 minutos, pero só podemos facelo dentro das posibilidades que nos ofrece o campo», sinala Vilachá, que quedou con sensacións positivas tras o encontro. «O prioritario era o resultado, xa que levabamos dúas derrotas seguidas en casa, pero ademais estivemos moi serios en defensa e xeramos oportunidades suficientes para non ter que esperar aos últimos minutos», engadiu Vilachá.
