é a historia dun desencontro. O Azkar convive esta semana coas pantasmas do pasado. O peor pesadelo regresa ao subconsciente azul coa visita este sábado (18.00 horas) do FC Barcelona Alusport, vixente campión de Liga, Copa de España e Copa do Rei.
A disputa entre lucenses e cataláns remóntase aos albores do Azkar en Primeira División. Cada encontro convértese practicamente nun derbi. Mil anécdotas en partidos cheos sempre de intensidade, goles e testosterona a gallarón regan un partido esperado polos acérrimos seguidores locais do Municipal con ánimo de vinganza polas dúas goleadas que encaixou o cadro azul durante a pasada campaña.
O Azkar caeu en partido de Liga (2-5) na segunda volta e a masacre continuou no encontro de ida pertencente ás semifinais da Copa do Rei cun esclarecedor 2-9. O desencadenamento desa ofensiva desmedida naceu tras a inesperada vitoria dos xogadores pronistas no Palau Blaugrana (1-3) na primeira volta da pasada campaña. O persoal culé non tivo que someterse a ningunha terapia de choque para superar tal afronta e nos seguintes enfrontamentos pagárono os pupilos de, por aquel entón, Bruno García.
Paso cara á elite
O FC Barcelona deu un brusco cambio en sección de fútbol sala tras o seu ascenso a Primeira División. Co adestrador Marc Carmona á fronte dun proxecto colosal, o persoal do cadro culé non deixou de crecer a imaxe e semellanza da sección de fútbol. A pedra angular do proxecto azulgrana é o seu capitán, Javi Rodríguez, O dobre campión do mundo coa selección española é a xogador franquía e o centro de todas as miradas no Municipal. é o xogador máis mediático de Primeira División e lonxe de vivir un retiro dourado na Cidade Condal as súas ansias de triunfos non fixo máis que aumentar dado o poderío dun conxunto que deixou claras as súas aspiracións a anterior tempada coa consecución do triplete nacional.
Historia
A primeira vitoria do Azkar ante o FC Barcelona en Primeira División remóntase á tempada 2002-2003, logo de vencer 4-2 en Lugo a un equipo catalán aínda en proceso de adaptación á categoría.
A actualidade sufriu un xiro vertixinoso na clasificación cos dous equipos situados en ambos os polos. O conxunto visitante é o actual líder na máxima categoría do fútbol sala nacional, empatado co Pozo Murcia, con 41 puntos. Mentres, o Azkar Lugo saíu dos postos de descenso xornada pasada tras a súa vitoria a domicilio fronte aos Ríos Renovables. O sábado, sen dúbida, será un partido con alicientes.
