O xuíz da Audiencia Nacional Santiago Pedraz rexeitou unha vez máis enviar a prisión provisional ou retirar o pasaporte ao líder da Fronte Polisaria, Brahim Gali, a quen pediu estar localizable tras tomarlle declaración por videoconferencia por mor de varias querelas interpostas contra el.
Pedraz segue considerando que non hai motivos que xustifiquen medidas tan gravosas como as solicitadas polas acusacións —por delitos de lesa humanidade, xenocidio e torturas, entre outros— e finalmente optou por seguir o criterio da Fiscalía, que pedira que Gali achegase un domicilio e un teléfono para estar localizable.
O xuíz non ve "risco de fuga algún" porque "non consta" ningún dato "para apreciar que o investigado poida ou queira subtraerse á acción da Xustiza, máxime á vista de que en canto tivo coñecemento dos feitos investigados presentouse na causa e accedeu á práctica da súa declaración, incluso á vista do estado de saúde no que se atopa que ben lle permitiría á súa defensa solicitar pospoñer a declaración".
Sinala ademais que a acusación "non forneceu elementos sequera indiciarios" que avalen "a existencia de motivos bastantes para crelo responsable de delito algún", dado que as declaracións de testemuñas prestadas hai anos "non teñen proba corroborativa e delas non se segue unha participación nos feitos do investigado".
Na súa declaración, Brahim Gali negou calquera implicación nas graves violacións de dereitos humanos que se lle atribúen nas dúas querelas presentadas na súa contra. O líder da Fronte Polisaria, que declarou por videoconferencia desde o Hospital de San Millán-San Pedro (Logroño), onde está ingresado por complicacións derivadas do covid-19 desde o pasado 18 de abril, estaba citado por unha querela formulada pola Asociación Saharauí para a Defensa dos Dereitos Humanos e por outra presentada polo activista saharauí Fadel Breica.
"O presidente Ghali explicou que a súa participación, como ministro de Defensa naquela época, non tiña ningún tipo de responsabilidade nin de acción na conduta que se lle imputaba por parte das acusacións", dixo o seu avogado, Manuel Ollé, en declaracións á prensa ao termo da comparecencia xudicial.
