O ministro do Interior en funcións, Fernando Grande-Marlaska, recordou ao presidente catalán, Quim Torra, que en España "hai separación de poderes" e que as operacións policiais son "acordadas polos xuíces".
Grande-Marlaska, quen presidiu en Logroño o Día da Policía Nacional, referiuse así, a preguntas dos xornalistas, á carta remitida por Torra ao presidente do Goberno en funcións, Pedro Sánchez, na que lle pide explicacións polas detencións de membros dos Comités de Defensa da República (CDR) o marco dunha operación policial.
"Trátase dunha investigación xudicial, na que a Garda Civil actúa como Policía Xudicial, baixo as directrices da autoridade xudicial e nunha cuestión que se atopa baixo segredo, e non serei quen vaia vulneralo", dixo o ministro.
Pero incidiu en que "o que lle recordaría ao señor Torra é que España é un Estado de dereito, onde hai separación de poderes, e esta operación foi acordada por un xuíz no marco das súas competencias".
"O poder Executivo respecta esa separación de poderes, como non podía ser doutro xeito", afirmou Grande-Marlaska, quen considerou que "ultimamente hai que dicir obviedades".
Tamén se referiu á posibilidade de reforzar a presenza de axentes de seguridade en Cataluña con motivo do 1 de outubro e explicou que, "máis aló da transparencia da que facemos práctica diaria, no que é estritamente seguridade, se esixe que sexamos razoablemente discretos".
Explicou que se fará unha avaliación previa das necesidades, en colaboración cos Mossos d'Escuadra, que son os competentes en cuestións de seguridade cidadá en Cataluña, e adoptaranse decisións "en termos de necesidade e proporcionalidade".
"Non se trata de enviar un número de policías ou outro, senón de cumprir o que está estipulado, que é garantir a seguridade para que o conxunto de cidadáns poidan exercer os seus dereitos e liberdades", destacou, e iso farase "con eses criterios de necesidade e proporcionalidade e en colaboración cos Mossos".
