A auxiliar de enfermería Teresa Romero, que superou o virus do Ébola tras contaxiarse coidando a un misioneiro infectado, testificará este mércores en calidade de prexudicada na investigación da denuncia de varios médicos do Hospital Carlos III sobre o risco que houbo para os profesionais.
Na providencia da maxistrada María Teresa Abad, do xulgado número 21 de Plazaa Castilla, á que tivo acceso Efe, cítase a Romero ás 10.30 horas, en calidade de prexudicada así como a médico de familia que a atendeu no seu centro de saúde en Alcorcón.
A avogada da doutora, Ana Pérez das Heras, dixo a Efe que a médico de familia non acudirá este mércores ao xulgado, xa que tras recibir a providencia, presentou un escrito explicando que chegara a un acto de conciliación con Romero e que nunca fora a súa intención exercer accións penais ou civís como prexudicada nin pedir unha indemnización.
A investigación foi aberta pola xuíza tras a denuncia presentada por quince médicos intensivistas do Hospital Carlos III, unha parte dos que a atenderon durante o seu internamento, ao considerar que se incorreu en grave risco para os profesionais por parte da administración sanitaria madrileña", dixo a Efe o avogado José Luis Muga.
Á denuncia inicial dos médicos, sumáronse a propia Teresa Romero, os sindicatos Afem, SAE, CSI-F e o Consello de Enfermería, explicou Muga, avogado de Afem.
Durante a vista, Romero deberá responder as preguntas do seu avogado, do fiscal e demais letrados acudidos na causa, que está por instruír, xa que esta é a primeira actuación que se fai, engade Muga. Tras iso, eventualmente pedirase que se practiquen diversas probas para determinar a responsabilidade de altos cargos sanitarios na xestión do ébola, concluíu o avogado do Estudio Jurídico Liria.
Teresa Romero testifica este mércores en calidade de prexudicada polo contaxio do ébola
A vista responde á denuncia do persoal sanitario contra o Hospital Carlos III polos riscos que correron os profesionais
