A ex vicepresidenta do Goberno Soraya Sáenz de Santamaría e a súa contorna próxima non asistiron á reunión do Grupo Parlamentario Popular no Congreso, a primeira con todos os deputados presidida polo novo presidente do partido, Pablo Casado, quen a derrotou nas primarias 'populares' do pasado mes de xullo.
Á ausencia de Santamaría sumáronse as de Cristóbal Montoro, ex ministro de Facenda, a de Fátima Báñez, ex ministra de Emprego, e a do tamén exministro Álvaro Nadal. Os dous primeiros tampouco acudiron ao Pleno que celebra o Congreso desde as 11, no que si participa Nadal.
Outro ausente é José Luís Ayllón, man dereita de Sáenz de Santamaría no Goberno, onde primeiro foi secretario de Estado de Relacións coas Cortes e despois director de gabinete de Mariano Rajoy.
Con todo, Ayllón aceptou un cargo do PP no Congreso, a vicepresidencia primeira da Comisión Mixta para a UE que ocupaba precisamente Pablo Casado. O colaborador de Santamaría manterá así un posto institucional.
Fontes 'populares' aseguran que Santamaría si acudirá ao Congreso a votar. O pleno debate tres decretos lei que teñen que ser aprobados pola Cámara e cóntase coa presenza da exvicepresidenta, do mesmo xeito que coa do resto do grupo. De momento, nin Santamaría, nin Báñez nin Montoro aceptaron un posto na dirección do grupo nin na institución. Descoñécese o futuro da exvicepresidenta, aínda que tras o verán fontes da dirección do PP non descartan que estea a buscar unha alternativa fóra da política.
COSPEDAL, EN PRIMEIRA FILA. Quen si acudiu á reunión do grupo popular ás 9 foi a ex ministra de Defensa e ex secretaria xeral do PP, María Dolores de Cospedal, quen se presentou riseira e ocupou asento na primeira fila da sala, xunto á dirección do grupo.
Tamén acudiu á cita Celia Villalobos, veterana deputada que acaba de perder o seu escano na Deputación Permanente do Congreso tras case 30 anos, substituída pola nova dirección 'popular'. Villalobos optou por ocupar un escano na última fila da sala e fíxoo soa, aínda que xusto antes de empezar a reunión sentouse ao seu lado outra deputada que acababa de chegar.
