O presidente do Goberno, Pedro Sánchez, non comparecerá o próximo día 23 de outubro no Senado para aclarar as "dúbidas" que o PP ve na súa tese doutoral, a pesar de que esta comparecencia fora acordada pola maioría absoluta do grupo popular na Cámara Alta.
Así o comunicou este martes o secretario de Estado de Relacións coas Cortes, na reunión da Xunta de Portavoces do Senado, quen argumentou a falta de precedentes e de previsión regulamentaria para este tipo de comparecencias específicas do xefe do Executivo.
O portavoz socialista, Ander Gil, apoiou a negativa do Goberno á comparecencia de Sánchez, que xustificou tamén por esa ausencia de precedentes e a falta de "amparo" regulamentario e arremeteu contra o PP, ao que acusou de "manosear" a institución e de usala para "vingarse" da moción de censura que gañou Pedro Sánchez.
Recordou Gil que Mariano Rajoy non compareceu nin unha soa vez no Senado nos sete anos en que foi presidente, e ratificou que o xefe do Goberno está disposto a acudir ao pleno da Cámara Alta para falar, a petición propia, de política xeral, como xa fixo no seu día José Luis Rodríguez Zapatero, pero non deu datas.
