O presidente do Goberno, Pedro Sánchez, asegurou que España está "preparada" para a vacinación contra a Covid-19, que comezará "en xaneiro" e ofreceuse a vacinarse publicamente para aumentar a confianza dos cidadáns.
"Estamos ante o principio do fin pero non podemos baixar a garda. Temos a estratexia de vacinación preparada. Neste nadal regalémonos seguridade", pediu Sánchez este mércores nunha entrevista en Telecinco, recollida por Europa Press.
Ademais, o presidente do Goberno ofreceuse "sen ningunha dúbida" a vacinarse "publicamente, non só como presidente, senón como cidadán", para que ese 55,2% que desconfía e di que non vai vacinarse inmediatamente cambie de opinión. De xaneiro a maio, estiman que estean vacinadas 20 millóns de persoas en España.
"Van contar con todas as garantías e seguridade", subliñou Sánchez, destacando a boa resposta que tivo este ano a vacinación da gripe que aumentou un 30% de media.
Preguntado por se fará falta levar un carné de vacinación, o presidente precisou que "a vacina en España vai ter un acceso equitativo" e "todos van poder vacinarse", empezando polos "maiores e os sanitarios".
A partir de aí, segundo dixo, despregaranse os exercicios loxísticos, con 15.000 "puntos de vacinación" e terán que facer o rexistro de vacinación". "Estamos preparados", asegurou, para precisar que todo comezará "en canto a Axencia Europea de Medicamentos dea o si".
Sobre o discurso da chanceler alemá Angela Merkel, que pediu encarecidamente aos cidadáns que queden en casa porque é "inaceptable" que o prezo a pagar sexan "590 mortos diarios", Sánchez dixo que este chamamento da chanceler alemá non lle parece "nada excesivo nin sobrerrepresentado".
NADAL COA SÚA MULLER, FILLAS, PAIS E SOGRO. No seu caso, segundo indicou o presidente do Goberno, vai pasar o Nadal cos seus "familiares máis próximos", coas súas fillas, a súa muller, os seus pais e o seu sogro, e asegurou que intentará manter "os menos contactos posibles" e a menor mobilidade.
"O virus ten unha letalidad moi alta pero non é intelixente. Sabemos o que temos que facer, sabemos que se hai máis mobilidade e máis contactos, hai máis contaxios. Mantendo as distancias estaremos a facer algo moi bo para o país e para protexer aos nosos seres queridos", advertiu.
