RTVE ofreceu a PSOE, PP, Unidas Podemos, Ciudadanos, Ahora Repúblicas e Vox participar nun debate a seis de cara ás eleccións ao Parlamento Europeo do 26 de maio.
A radiotelevisión pública propuxo celebrar o debate a noite do 22 de maio ás 22 horas e emitilo na 1, a Canle 24 Horas e RTVE.es. Nun comunicado, a corporación pública explicou que se invitou a participar a aqueles partidos que obtiveron dous ou máis eurodeputados nas eleccións europeas de 2014 e a Vox "na súa condición de partido significativo, ao obter máis dun 5% dos votos nas últimas eleccións xerais".
De aceptar a invitación, sería a primeira vez que o partido de extrema dereita participa nun debate da televisión pública española.
RTVE afirmou que se compromete a que "o tratamento informativo do próximo proceso electoral constitúa unha referencia desde o punto de vista do pluralismo, a neutralidade e o máis absoluto respecto dos intereses da cidadanía".
A celebración do último debate -para as eleccións xerais- en RTVE estivo rodeada de polémica debido á tentativa de cambiar a súa data para que o presidente do Goberno, Pedro Sánchez, puidese acudir tamén ao que se celebraría en Atresmedia.
Nas eleccións europeas do 26 de maio elixirase a 54 deputados españois.