Once anos logo dos atentados do 11M, asociacións de vítimas, axentes sociais e cidadáns recordarán na capital aos 192 mortos pola explosión de once bombas en catro trens o 11 de marzo de 2004.
O primeiro acto en memoria das vítimas terá lugar ás 10:00 horas no monumento da estación de Atocha convocado polos sindicatos UGT e CC OO e a Unión de Actores, onde os asistentes portarán 192 globos brancos, un por cada vítima mortal. Media hora despois, na catedral da Almudena, o arcebispo de Madrid, Carlos Osoro, oficiará unha misa funeral.
Outro dos tradicionais actos de homenaxe terá lugar a medio día no Bosque do Recordo, no parque do Retiro, onde Ángeles Pedraza, presidenta da Asociación de Vítimas do Terrorismo (AVT), organizadora da homenaxe, lerá un manifesto polas vítimas, en defensa da verdade, memoria, dignidade e xustiza.
Despois realizarase unha solta de globos e, como cada ano, gardarase un minuto de silencio e farase unha ofrenda floral na cima do Bosque do Recordo. A este acto asistirá o secretario xeral do PSOE, Pedro Sánchez, e os candidatos do seu partido ao Concello e á Comunidade de Madrid, Antonio Miguel Carmona e Ángel Gabilondo, respectivamente. Así mesmo, a presidenta do PP de Madrid e candidata á Alcaldía, Esperanza Aguirre, tamén acudirá á misa na catedral da Almudena.
Noutros puntos
11M, once anos despois
Asociacións de vítimas, axentes sociais e cidadáns volven homenaxear na capital os 192 mortos pola explosión de once bombas en catro trens o 11 de marzo de 2004
