O voo AK837 de Air Canada con destino a Toronto aterrou sen problemas sobre as 19.07 deste luns no aeroporto Adolfo Suárez Madrid-Barallas despois de case cinco horas sobrevoando o espazo aéreo de Madrid. Trátase dun avión Boeing 767-300 da compañía canadense que despegou do aeroporto madrileño rumbo a Toronto (Canadá) ás 14.33 horas con 130 persoas a bordo e, tras detectar problemas técnicos tivo que prepararse para volver tomar terra.
O Sindicato Español de Pilotos de Liñas Aérea (Sepla) detallou que o avión perdeu pezas do tren de aterraxe que entraron no motor esquerdo, polo que tivo que estar varias horas queimando combustible, tal e como marca o protocolo, antes de aterrar.
A aterraxe estaba prevista para as 19.15 horas, aínda que se adiantou. Pese a faltarlle unha roda e aínda que só lle funcionaba un motor, non se rexistraron incidentes.
O comandante do voo AK837 pedira "moita calma e moita paciencia" á pasaxe neste procedemento. Nun audio divulgado por El Mundo, o comandante sinalaba que o avión ía volver ao aeroporto Adolfo Suárez Madrid-.Barajas por un problema "cunha das rodas do avión" no despegamento.
Un avión F-18 da Forza Aérea española estivo a acompañar ao de Air Canadá para tratar de comprobar mellor a posible avaría do aparello e axudar na medida do posible. Nun momento dado non se descartaba que o avión puidese aterrar na base de Torrexón no canto de na terminal de Barajas se o caza que o escoltaba o aconsellaba.
Un dos pasaxeiros asegurou vía Twitter que no interior da aeronave a pasaxe estaba tranquila. Activáronse seis dotacións de bombeiros da Comunidad de Madrid e 10 efectivos do SUMMA 112 despregáronse no preventivo activado na zona. Ademais hai unha carpa de emerxencias de Cruz Vermella. A Consellería de Sanidade alertou a toda a rede de hospitais.
Aqui todo esta tranquilo pic.twitter.com/EZ9Ij4t4pg
— Carlos Castañeda (@CarlosC97620547) February 3, 2020
PECHE DO ESPAZO AÉREO. O aeroporto de Madrid-Barajas Adolfo Suárez renovou a súa actividade despois de que a presenza de polo menos un dron obrigase a pechar o espazo aéreo por máis dunha hora e desviar 22 voos, segundo o xestor do tráfico aéreo Enaire.
O xestor de infraestruturas aeroportuarias Aena informou de que, entre os voos desviados, sete dirixíronse a Valencia, tres a Barcelona, dúas a Alacante-Elxe, outros dous a Valladolid e tres a Zaragoza.
A Policía Nacional e a Garda Civil tratan de localizar ao operador do dron ou drons detectados sobre o aeroporto, para o que despregaron patrullas nos arredores, confirmaron a Efe fontes de ambos os corpo, que agregaron que se constituíu un comité local de seguridade no aeroporto, no que participan Aena, Enaire, a Garda Civil e a Policía Nacional.
O peche do aeroporto produciuse ao redor das 13.00 logo de detectar a presenza de drons no espazo aéreo, nun día xa complicado para o tráfico aéreo pola intensa néboa que cobre o aeródromo madrileño.
Enaire recomenda aos pasaxeiros consultar os voos coas aerolíneas e recorda que os drons "non son xoguetes".
A Axencia Estatal de Seguridade Aérea (AESA), responsable da normativa de voos, aclarou que analizará a gravidade da infracción e que en función diso imporá a multa correspondente, que oscila entre 60 e 225.000 euros
