A aparición do novo DNI electrónico permitirá aos cidadáns, entre outras funcións, un acceso máis rápido polo control de fronteira dos aeroportos, como tamén axilizará algo tan sinxelo como a firma de autorizacións do colexio dos nenos, e servirá aos policías para consultar in situ os antecedentes ou infraccións dunha persoa.
Estas son algunhas das utilidades do DNI electrónico 3.0 que o ministro do Interior, Jorge Fernández Díaz, presentou en Lleida, afirmando ademais que este documento conta coas medidas de seguridade máis avanzadas do momento.
O Documento Nacional de Identidade repercutirá no día a día dos cidadáns e das forzas de seguridade do Estado, que poderán dar uso das múltiples utilidades do DNI mediante a súa colocación na parte posterior dun teléfono intelixente ou dunha tableta. Para iso, unha antena interna de radiofrecuencia conectará o smartphone co DNI permitindo o acceso a servizos telemáticos.
O novo documento sérvese da tecnoloxía inalámbrica NFC, que permite o intercambio de información entre obxectos que se atopen a curta distancia. A NFC está presente en múltiples dispositivos, desde teléfonos móbiles a cartóns de crédito, pasando por abonos de transporte, televisores, equipos de son ou bonecos físicos de videoxogos como Skylanders. Esta tecnoloxía de curto alcance -uns 20 cm- é útil para o intercambio de datos, a identificación das persoas ou os pagos (Apple Pay, o sistema de pagos móbiles de Apple funciona mediante NFC).
Outras das vantaxes e utilidades das que gozará este DNI 3.0 e das que aínda non falamos son as seguintes:
- Evitar desprazamentos á sede de organismos públicos para realizar diversas tarefas.
- Comunicarse directamente coa administración mediante as aplicacións de distintos organismos como a Policía, o Concello ou a Seguridade Social.
- Consultar a vida laboral ou as multas de tráfico.
- Pagar taxas á administración.
Nesta presentación estivo presente a nadadora olímpica Mireia Belmonte, a quen o ministerio decidiu expedir o primeiro DNI electrónico 3.0.
