O Partido Popular negou este venres que manteña negociacións co expresidente de Cs, Albert Rivera, para absorber ao partido de Inés Arrimadas, algo que "non sería viable" xa que o exdirixente laranxa xa non forma parte da cúpula desta formación.
Así o apuntou nunha entrevista con Radio Nacional a portavoz do PP no Congreso dos Deputados, Cuca Gamarra, que sinalou así mesmo que os populares respectan "moito" ás direccións do resto de partidos.
"Non pensamos en absorber a ninguén", apuntou Gamarra, que argumentou que o seu horizonte é "máis ambicioso" e "vai máis aló" de acordos entre partidos pois fan un chamamento aos españois para participar no PP facéndoo "máis atractivo" e "próximo" aos seus problemas.
Tamén o portavoz nacional do PP e alcalde de Madrid, José Luís Martínez-Almeida, apuntou nunha entrevista con Telecinco que "non lle consta" que Rivera "estea a mediar nunha fusión entre o PP e Cs".
A ollos do rexedor madrileño, Rivera foi "un gran político", que fixo un proxecto político extraordinario" e deixou un legado "máis que interesante", pero recordou que "el o que decidiu é dedicarse á avogacía".
Por outra banda, a portavoz do PP no Congreso volveu a defender o liderado de Pablo Casado á fronte do partido tras o mal resultado en Cataluña.
"O PP é moito PP e o presidente do PP é moito presidente do PP, non hai que perderlle o respecto", afirmou pola súa banda Gamarra, para lanzar a continuación unha advertencia: "outros tiveron un bo resultado e creron que o conseguiron todo e agora xa vemos onde están".
Gamarra foi preguntada ademais polas declaracións este xoves do presidente da Xunta, Alberto Núñez Feijóo, que en TVE falou dun "dobre mal resultado" porque o PP non fora capaz de beneficiarse da caída de Cidadáns.
"Hai que facer moitas lecturas e moitas análises", apuntou a portavoz popular e agregou que Casado xa sinalou "a necesidade de seguir avanzando en consolidar un centro político máis amplo e máis sólido".
Tamén lanzou unha mensaxe a Vox no caso de que faga perigar gobernos autonómicos tras a súa vitoria en Cataluña: "se alguén cae na tentación por un momento de euforia de caer na inestabilidade, estará a fortalecer un proxecto de esquerda socialista e comunista".