O Supremo comunicará aos implicados no procès os seus autos de procesamento o vindeiro venres e, ademais, celebrará unha vistiña para posibles medidas cautelares para a expresidenta do Parlament Carme Forcadell, a ex secretaria xeral de ERC, Marta Rovira, e os ex consellers Jordi Turull, Raúl Romeva, Josep Rull e Dolors Bassa.
O xuíz que instrúe o caso polo procès no Tribunal Supremo, Pablo Llarena, comunicará os autos de procesamento o vindeiro venres aos 28 imputados neste caso ás 10:30 horas. Ademais, someterá ás persoas citadas a unha vistiña para decidir se lles impón prisión preventiva ou as mantén en liberdade baixo fianza.
Nunha providencia asinada este mércores o maxistrado cita a todas as partes acudidas no sumario que el instrúe sobre o procès cara á Declaración Unilateral de Independencia para que o venres 23 de marzo ás 10:30 horas, acudan ao tribunal para que lles comunique o auto de procesamento.
TRES CONCLUSIÓNS. Deste xeito, a decisión do maxistrado abre tres novidades: unha, que podería haber novas prisións preventivas (ou non); dous, que se achega o momento de abrir xuízo oral, posto que como xa dixo nalgún dos seus autos o maxistrado e demostra este novo paso adiante na instrución, a investigación está a chegar ao seu fin.
E tres, que a posible candidatura de Jordi Turull á presidencia da Generalitat poderíase ver afectada o caso de que se adoptase unha medida de prisión contra el, pois iso podería conducir á súa suspensión, iso si, supondo, ademais, que fose procesado por rebelión.
En todo caso, trátase de posibilidades que se confirmarán o venres, cando se coñeza cal é o delito polo que resultan procesadas as persoas implicadas e tamén que medidas cautelares adopta o maxistrado.