A Policía non acha probas de que Corinna contratase a Villarejo para espiar

A examiga do Rei emérito afirma que Juan Carlos I movía grandes sumas de diñeiro regularmente entre Suíza e Madrid 
Corinna Larsen, en un momento de la entrevista concedida a OK Diario. OK DIARIO
photo_camera Corinna Larsen, nun momento da entrevista concedida a OK Diario. OK DIARIO

A Unidade de Asuntos Internos da Policía comunicou ao xuíz do caso Villarejo que non achou ningún dato que corrobore que a examiga de Juan Carlos I Corinna Larsen contratase ao excomisario José Villarejo para que espiase datos persoais dunha asistente española da que sospeitaba. 

A defensa de Villarejo alude a este novo informe policial nun escrito no que se adhire ao recurso de Larsen ante a Sala do Penal da Audiencia Nacional contra a reapertura desta peza en xullo e que supuxo a imputación da empresaria alemá e do excomisario. "O informe policial supón un xerro de auga fría para o instrutor tras a reapertura da peza Carol acordada o pasado 27 de xullo, que non só foi recorrida polas defensas de Larsen e Villarejo senón que, ademais, conta con obstáculos xurídicos postos de manifesto pola Fiscalía Anticorrupción", destaca a defensa. 

Corinna: "As súas finanzas non eran o meu negociado, tiña un coñecemento mínimo, e do resto, do do diñeiro de Suíza decateime polo proceso xudicial"

No escrito, presentado este luns, o avogado de Villarejo, Antonio José García Cabrera, lamenta tamén que a reapertura desta peza, o número 5 do caso Tándem, "é o máis claro exemplo dunha investigación prospectiva". 
Alega ademais que esta decisión está baseada nuns audios, cuxa existencia, polo menos un deles, era xa coñecida cando se arquivou esta causa en 2018, polo que non se trataría de feitos novos que xustifiquen a reapertura. Segundo o informe policial ao que alude o escrito, salvo a referencia que se fai á asistente nos audios gravados por Villarejo, non se atopou "ningún outro dato vinculado ao encargo que corrobore obxectiva e minimamente que este chegase a executarse". 

A ENTREVISTA DE CORINNA. A examiga de Juan Carlos I asegurou que os administradores do Rei emérito transferiron grandes sumas de diñeiro entre Suíza e Madrid de forma regular. Apunta que aínda que descoñece a cantidade exacta, cre que en cada valixa irían entre 250.000 e 300.000 euros, e que polo que puido coñecer polos documentos que se achegan ao procedemento que se segue na xustiza suíza, poderían terse trasladado cinco millóns en total. 

Nunha entrevista concedida a OK Diario en Londres, recollida por Europa Press, a examiga do emérito, que recoñece que mantivo unha relación sentimental co monarca, desvela que ao longo do proceso xudicial viuse que incluso chegaba o diñeiro en voos comerciais e que "debeu haber un arranxo especial" para facilitar eses movementos. Neste sentido, na entrevista sinala que a ela como anglosaxoa e escandinava, lugares nos que "as monarquías están máis reguladas", sorprendeulle que España funcionase como unha oligarquía na que cen persoas controlan o país. 

Ademais, indicou que polo que parece, ao longo de 40 anos sábese de moitos agasallos e grandes transaccións para os intereses comerciais de España, e lamentou que "agora só se apunta a unha cantidade, a unha transacción", que é a que estaría relacionada con ela. "Isto é moi conveniente porque a xente esquece canto máis pode haber aínda por descubrir", indicou. 

Ao fío, Corinna tratou de desvincularse das finanzas persoais de Juan Carlos I afirmando que ela "non era a súa esposa e non vivía na súa casa", e negouse a comentar se houbo máis transaccións offshore. "As súas finanzas non eran o meu negociado, tiña un coñecemento mínimo, e do resto, do do diñeiro de Suíza decateime polo proceso xudicial", dixo. 

Sostén que o monarca tamén pretendía "asegurar o futuro" doutra das mulleres coas que se lle relaciona sentimentalmente, Marta Gayá

Por iso, a empresaria alemá sinala que desde o seu punto de vista a "crise" que vive a Casa Real foi orixinada polas "accións de diferentes persoas con diferentes axendas", e que a propia Casa Real "foi a artífice dos seus propios problemas", ao que se sumou que houbo persoas "que lles aconsellaron mal".  

A DONACIÓN DE 65 MILLóNS. Noutro momento da entrevista, cando lle preguntan pola doazón que recibiu de 65 millóns do Rei emérito, Corinna sinala que se tratou dun agasallo, e que en 2011 cando o monarca estivo enfermo faloulle das súas últimas vontades e de que quería deixar certas cousas ao fillo de Larsen, Alexander, pero non só falaba de cantidades económicas senón de cousas "sentimentais como a súa colección de armas". 

Neste sentido, explicou que noutra conversación con Juan Carlos I, este confesoulle que temía por que a súa familia non respectase os seus desexos se o deixaba por escrito nun testamento normal, e incluso lle chegou a falar abertamente da —tamén amiga do rei emérito— Marta Gayá, á que tamén desexaba "asegurar o seu futuro". "Así que quería facer unha contribución, facernos un agasallo, nunca entendín nin nunca falei de canto. Teñen que entender que eu nunca pedín nada. Foi puramente desexo seu e non pode discutirlle a un home o que quere regalar. Era un agasallo incriblemente xeneroso", sinalou. 

Corinna, sobre os 65 millóns recibidos: "O agasallo de 2008 e o contrato do AVE de 2011 non teñen nada que ver o un co outro"

E engade que a súa doazón tardou en materializarse porque o emérito tomouse o seu tempo para documentala con atención, para o que usou notarías para evitar que a familia real "non puidese despois cuestionar esta doazón". Sobre a suma final, 65 millóns, Corinna indica que tendo en conta que medios como Forbes apuntan a que Juan Carlos I posúe unha fortuna que rolda os 1.200 millóns de euros, a cantidade recibida en relación a iso non é desproporcionada.

Comentarios