O paro reduciuse en 99.512 persoas en maio, ata un total de 2.922.911 desempregados, baixando dos tres millóns por primeira vez desde decembro de 2008, mentres que o emprego creceu con 213.643 afiliados máis de media á Seguridade Social.
Segundo os datos facilitados este xoves polo Ministerio de Traballo, trátase da cifra máis baixa de desempregados desde novembro de 2008, ao comezo da crise financeira.
Respecto de maio de 2021, o total de desempregados descendeu en 858.259 persoas.
En maio, o paro baixou en todos os sectores económicos fronte a abril con especial forza en servizos, 64.230 parados menos; seguido de construción, con 10.008 parados menos; agricultura, 8.693 menos; e industria, 7.968 menos.
Tamén descendeu no colectivo sen emprego anterior en 8.613 persoas.
Por sexo, o desemprego feminino baixou en maio en 47.403 mulleres, ata
E por idade, o desemprego dos mozos menores de 25 anos tamén baixou en maio en 21.973 persoas respecto ao mes anterior, deixando o total de parados nesa franxa en 199.920, a menor cifra da serie histórica.
Por rexións, o paro rexistrado baixou en todas as comunidades autónomas.
En canto á contratación, en maio asináronse 730.427 novos indefinidos, a cifra máis alta en calquera mes da serie histórica, tras a aprobación da reforma laboral.
Esta cifra supón practicamente a metade de todos os contratos rexistrados (1.640.595) e, por tipo, 291.308 foron a tempo completo, 264.524 fixos descontinuos e 174.595 a tempo parcial.
A AFILIACIÓN CRECE CON 213.643 EMPREGOS EN MAIO. En canto á afiliación á Seguridade Social, creceu en maio en 213.643 persoas de media, unha cifra en liña coas de maio de 2021 e 2019, pechando o mes con 20.232.723 ocupados ás portas da tempada de verán.
"O dinamismo do emprego mantense en maio a pesar do contexto de incerteza", destaca o Ministerio de Inclusión e Seguridade Social, que tamén incide en que "os efectos positivos da reforma laboral seguen intensificándose".
En cifras desestacionalizadas, o avance da afiliación é de 33.366 persoas no último mes e supón sumar 185.987 traballadores desde o peche de 2021.
"Respecto ao nivel de emprego de hai un ano, o crecemento é de 955.607 ocupados e respecto ao nivel prepandemia aumentou en case 540.000 persoas, grazas ao impulso do emprego privado", engaden.
En canto ao tipo de contrato, destacan que, ao peche de maio, rexístranse un millón máis de afiliados con contrato indefinido respecto do que era habitual antes da pandemia nun mes de maio.
En maio, engaden, o 79 % dos afiliados teñen contratos indefinidos, o que supón 8 puntos máis do habitual antes da pandemia.
En canto aos Erte, 22.454 traballadores están
EN GALICIA O PARO REDUCIUSE EN 4.482 TRABALLADORES. O paro reduciuse en Galicia no mes de maio en 4.482 traballadores, un 2,96 % respecto ao mes anterior, ata 146.120 desempregados; mentres que o emprego creceu na comunidade con 6.751 afiliados máis de media á Seguridade Social, un 0,65 %, que alcanza 1.040.748 persoas rexistradas.
Segundo os datos facilitados este xoves polo Ministerio de Traballo, no último ano o paro reduciuse en Galicia en 19.186 persoas, un 11,6 %; mentres que a redución anual media de España é case do dobre, o 22,7 %.
Por provincias, o descenso do paro foi maior en Pontevedra, tanto en termos absolutos (-2.138 persoas) como relativos, cun 3,59 de caída, por encima da media nacional; unha media que tamén superou Ourense, onde o desemprego se reduciu en maio un 3,32 por cento.
O paro segue afectando máis a mulleres (58,3 %) que a homes (41,7 %) na comunidade e o sector máis castigado é os servizos, que acumula o 70 % dos parados en Galicia, con 102.459 desempregados en maio.
Todos os sectores reducen o paro en maio, con todo, encabezados polo propio servizos, onde o desemprego se reduce en 3.293 traballadores.
A modificación na normativa de contratación segue notándose e no mes de maio case catro de cada dez contratos dos 69.557 rexistrados na comunidade foron indefinidos (37,9 %).
Este mes, ademais, fixéronse 48.165 solicitudes de prestacións dalgún tipo e producíronse 48.801 altas, cun prazo de recoñecemento de 1,04 días; polo que o número total de beneficiarios dalgún tipo de prestación na comunidade alcanza as 83.668 persoas.
En canto Seguridade Social, Galicia alcanza en maio de media 1.040.748 ocupados, 30.220 máis que hai un ano, un 2,99 %; que é un 40 % menos que a suma do conxunto do país, que chega ao 5,01 % no mesmo período para superar os 20,2 millóns de ocupados.
Por réximes, 813.024 persoas están inscritas no xeneral, das que 5.777 corresponden ao agrario e 24.629 ao servizo especial do fogar; mentres que hai 208.153 persoas rexistradas como autónomos e outras 19.571 inscritas no réxime do mar.
