A Mesa do Parlament tramitou este luns a reforma de Lei da Presidencia da Generalitat impulsada por JxCat que busca que a Cámara poida facer investiduras a distancia, sen que o candidato estea no hemiciclo.
Segundo fontes parlamentarias consultadas por Europa Press, Cs e PSC xa anunciaron na reunión –onde se deu luz verde á tramitación– que presentarán un recurso de reconsideración para que a Mesa enmiende a súa propia decisión.
Cs e PSC teñen 48 horas para presentar este recurso: se a Mesa o tomba –con toda probabilidade, porque hai maioría independentista–, os socialistas xa anunciaron que levarán a lei ao Consell de Garanties Estatutàries (CGE) da Generalitat.
JxCat pediu tramitar a lei pola vía máis urxente: normalmente o Consell ten un mes para pronunciarse sobre peticións dos partidos, pero neste caso debería facelo nun máximo de sete días.
As mesmas fontes sinalan que, tendo en conta todos os recursos que PSC e Cs prevén pór en marcha, ven imposible levar esta lei ao pleno da Cámara para a súa aprobación ata despois de Semana Santa.
O CGE é o órgano consultivo da Generalitat que se pronuncia sobre se as leis se adecuan á Constitución e ao Estatut, e os seus ditames son consultivos pero pesan moito nas decisións que logo toman os partidos e o Govern.
PUIGDEMONT VIAXA A HELSINQUI. O expresidente da Generalitat Carles Puigdemont viaxará este xoves a Helsinqui, invitado por un grupo de deputados finlandeses simpatizantes do movemento independentista catalán, informou este luns o portavoz deste grupo, o parlamentario Mikko Kärnä.
A mesma fonte explicou nun comunicado que durante a súa viaxe de dous día a Finlandia está previsto que Puigdemont visite o xoves pola tarde o Eduskunta (Parlamento finlandés) invitado polo denominado Intergrupo de Amigos de Cataluña, formado por oito deputados finlandeses de distintos partidos.
Segundo Kärnä, espérase tamén que Puigdemont dea unha conferencia pública o venres na Universidade de Helsinqui, centrada na situación política actual en Cataluña. Ademais manterá unha serie de reunións de carácter privado antes de abandonar Finlandia, xa o sábado pola mañá, explicou o deputado a Efe.
