Os países europeos do G7 inclúen a Nadia Calviño entre os aspirantes a dirixir o FMI

O Goberno español considera que é unha "boísima noticia para España"

Nadia Calviño. EFE
photo_camera Nadia Calviño. EFE

Os países europeos do G7 incluíron á ministra de Economía española en funcións, Nadia Calviño, na lista de candidatos a suceder a Christine Lagarde como directora xerente do Fondo Monetario Internacional (FMI), confirmaron fontes gobernamentais.

O Goberno español considera unha "boísima noticia para España" que Calviño sexa considerada entre o reducido número de persoas que podería dirixir un dos principais organismos financeiros internacionais. "É unha honra para este Goberno que a valía e a competencia dos seus integrantes sexa recoñecida a nivel internacional", engadiron as fontes citadas.

O Executivo agradece aos países europeos integrantes do G7 que suxiran o nome de Calviño e recalca a importancia de manter a unidade de acción entre os socios da Unión Europea (UE).

As fontes do Executivo español subliñan que o Goberno sempre apoiou que a dirección do FMI recaia nunha muller europea de recoñecido prestixio.

Calviño recoñeceu este mércores pola mañá, nunha entrevista na Cadea Ser, que tratara a súa posible candidatura á dirección do FMI co presidente do Goberno español, Pedro Sánchez. Segundo a titular de Economía en funcións, Sánchez apoiaría "por suposto a calquera ministro que puidese ter calquera posibilidade dun cargo así de importante".

Christine Lagarde presentou este martes a súa renuncia ao cargo de directora xerente do FMI, que será efectiva o 12 de setembro. A semana pasada, os ministros de Economía da UE formalizaron a candidatura de Lagarde á presidencia do Banco Central Europeo (BCE).

Comentarios