Un 9,7 % do gasto sanitario en España ten que ver con enfermidades relacionadas co sobrepeso, unha porcentaxe superior ao 8,4 % da media na OCDE e que corre o risco de aumentar á vista das tendencias preocupantes entre nenos e adolescentes.
Nun informe publicado este xoves sobre este fenómeno nunha cincuentena de países, a Organización para a Cooperación e o Desenvolvemento Económico (OCDE) destaca que cada cidadán en España ten que pagar 265 euros adicionais de impostos ao ano por eses gastos.
Os seus autores calculan que o exceso de peso resta 2,6 anos de esperanza de vida en España, unha cifra lixeiramente inferior aos 2,7 anos de media na organización e lonxe do máximo de 4,2 anos de México, dos 3,9 de Polonia e Rusia ou dos 3,7 de Estados Unidos. Pero tamén está afastada de Xapón, onde o recorte da esperanza de vida polo sobrepeso limítase a 0,9 anos.
Este problema sanitario e de estilo de vida reduce o produto interior bruto (PIB) español nun 2,9%, o que equivale a 479.000 traballadores a tempo completo ao ano.
O impacto económico é do 3,3 % do PIB na OCDE e na Unión Europea, e alcanza o 5,3% en México, o 5 % en Brasil ou o 4,4% en Estados Unidos.
Os expertos consideran que unha persoa está en sobrepeso cando a relación entre o seu peso en quilos e a súa altura en metros ao cadrado supera a cifra de 25. É obesa se pasa de 30.
O problema agrávase nos mozos entre 5 e 19 anos: un 34,1% teñen excesivo peso
En España, un 61,6% da poboación ten sobrepeso, fronte ao 59 no conxunto da UE e ao 58,3% na OCDE. A porcentaxe de obesos subiu desde o 17% en 1996 ao 23,8% en 2016.
A situación en termos comparativos é aínda peor para os nenos e mozos de 5 a 19 anos, xa que un 34,1% teñen un peso excesivo, comparados cun 27,6 % na UE e un 28,6% na OCDE.
Só 11 dos 52 países do estudo presentan peores cifras, empezando por Estados Unidos (41,8% en sobrepeso nese grupo de idade).
Os autores do estudo insisten en que o agravamento desa tendencia pódese corrixir coa promoción de estilos de vida saudables que, ademais de ter un efecto positivo para a saúde, supoñen "un excelente investimento": por cada euro dedicado obtense un retorno de ata 6 euros en beneficio económico.
A súa recomendación é un paquete de medidas que inclúa a etiquetaxe dos menús, a prescrición médica de actividade física e programas de benestar.
Iso podería previr ata 96.000 enfermidades de aquí a 2050, aforrar 32 millóns ao ano en custos sanitarios e aumentar o emprego e a produtividade no equivalente a 4.000 traballadores a tempo completo.
Se se reducise nun 20% a achega calórica de alimentos con alto contido en azucre, sal ou graxas, iso permitiría previr 472.000 enfermidades para mediados de século, evitar 169 millóns de euros de gasto sanitario ao ano e un aumento do emprego de 13.000 traballadores.
MUNDO. As cifras en España son superiores a unha vintena dos 52 países do estudo, en particular a EE.UU. (36,2%), Arabia Saudita (35,4%) e Turquía (32,1%), pero tamén a México (28,9%), Arxentina (28,3%) ou Chile (28%).
A OCDE certifica que os nenos cun peso excesivo obteñen peores resultados escolares, auséntanse máis das aulas, o risco de que sufran acoso escolar triplícase e ao crecer as súas posibilidades de conseguir unha titulación universitaria son menores. Chegados á idade adulta, as posibilidades de atopar un emprego son un 8% inferiores para unha persoa con sobrepeso e cando están ocupados son menos produtivos e están máis de baixa.
A redución dun 20% do contido calórico dos alimentos enerxéticos tería beneficios significativos para as persoas e para a economía.
Lineais sen segredos
Cada vez máis xente saca o móbil diante dos estantes do supermercado para chequear os códigos de barras. Con aplicacións como Yuka pódese saber que conteñen.
Básculas intelixentes
Avaliacións completas do corpo, con medicións da porcentaxe de masa muscular e de graxa para os brazos, as pernas e o tronco. Esas son as básculas do futuro.
Pulseiras para o corpo
É como levar un escáner corporal na boneca. Miden o ritmo cardíaco e as calorías que se consomen. Tamén analizan o soño e o tempo de descanso. As pulseiras coñecidas como Fitbit son ademais xa como un accesorio de moda.
