O militante de Vox Bertrand Ndongo axitou as redes sociais tras difundir este venres un polémico vídeo no que criminaliza á vítima da agresión sexual pola que foron condenados tres futbolistas da Arandina. O camerunés asegura que a lei "desampara totalmente" aos homes: "Eu teño tres fillos homes, e levanteime coa sensación de que calquera moza pode arruinar a súa vida cando lle dea a gana".
Segundo Ndongo, a Lei contra a Violencia de Xénero é "criminalmente inconstitucional" e "non respecta a igualdade ante a lei" de todos os cidadáns. "Escóitaas a elas sempre e a eles, nunca. elas sempre van ter razón", indica.
Qué es realmente ser MENOR DE EDAD!? pic.twitter.com/EDExjhOFL9
— Bertrand Ndongo (@bertrandmyd) December 13, 2019
Pero o vídeo non acaba aí, xa que o militante da formación ultradereitista carga tamén de responsabilidade á vítima da agresión: "¿Que é iso de menor? Podemos falar de menor de idade, pero se entramos no comportamento de moitas delas quédasche atafegado: consomen alcol, fuman... e ollo ás súas fotos de Instagram co cu en pompa e en tanga", expresa, engadindo que unha moza "pode facer o que lle dá a gana, pero logo cando ocorren cousas chámanas menores".
Ndongo xa se converteu en 'viral' o pasado mes de maio, cando publicou un vídeo no que chamaba "vella" e "inútil" á exalcaldesa de Madrid Manuela Carmena e a 'convidaba' a irse á súa casa "a facer madalenas".
