As máscaras deixarán de ser obrigatorias no exterior se se mantén 1,5 metros de distancia ou se está con conviventes, segundo informou este mércores a ministra de Sanidade, Carolina Darias, durante a rolda de prensa posterior ao Consello Interterritorial do Sistema Nacional de Saúde (CISNS).
Esta medida está incluída no Real Decreto Lei de flexibilización da máscara que aprobará este xoves o Consello de Ministros, que se celebrará de forma extraordinaria, e farase efectiva a partir do próximo sábado 26 de xuño. A iniciativa baséase nun informe elaborado polo Relatorio de Alertas e Plans de Preparación e Resposta. En calquera caso, sempre se deberá levar unha máscara enriba. A ministra non aclarou se será obrigatorio ou unha recomendación, e remitiuse ao que recolla o decreto.
No entanto, a máscara seguirá sendo obrigatoria en espazos pechados públicos (como unha biblioteca) ou espazos pechados de uso público, como unha farmacia ou un supermercado, e nos transportes públicos. Non será esixible para os pasaxeiros dun barco no seu camarote, e tampouco cando estean en cuberta e se poida manter a distancia de metro e medio.
Haberá que seguir usando a máscara nos eventos multitudinarios como un concerto, pero non será obrigatorio se se celebra co público sentado e se respecta o metro e medio de distancia.
Non a terán que levar os anciáns en cuxas residencias o 80 por cento teña a pauta completa de vacinación, aínda que os traballadores que os atenden si teñan que levala e as persoas que os visiten.
"Todos os indicadores dinnos que imos no camiño adecuado e, coas altísimas taxas de vacinación é aconsellable que se empece a introducir unha flexibilización respecto ao uso obrigatorio das máscaras", detallou Darias.
A proposta que se aprobará o xoves, a falta de detalles, é similar á formulada por Galicia, que defende que se retire a obrigatoriedade de máscara nos espazos exteriores con carácter xeneralizado e só se manteña cando non se poida cumprir a norma de metro e medio de distancia. Si será necesario o seu uso en terrazas —salvo no momento do consumo— ao non poder manterse esta distancia entre persoas, pero non, por exemplo, nun paseo entre conviventes.
Fíxoo en rolda de prensa ao termo da reunión do Consello Interterritorial de Saúde, na que detallou que a evolución da pandemia vaise igualando entre comunidades e só dúas autonomías presentan unha incidencia "de máis dun 20 % superior á media do país".
Revelou que estas comunidades, ás que non citou notifican o 34% dos casos e supoñen o 18% da poboación.