Os cinco españois do petroleiro 'Mattheos I' e outros tripulantes do barco, secuestrado o pasado 14 de setembro en augas do Golfo de Guinea, chegarán en avión a Madrid o vindeiro martes, se non hai contratempos.
Así o indicou hoxe a Efe a portavoz da empresa propietaria do petroleiro, Consultores de Navegación, Sheena Campbell, quen sinalou que o buque está a navegar agora cara a un porto "seguro", do que non facilitou información "por motivos de seguridade".
Unha vez desembarquen, os membros da tripulación serán sometidos a un recoñecemento médico para comprobar que non sufran danos físicos ou psicolóxicos polo secuestro, indicou a portavoz, quen xa dixo en anteriores declaracións que só había un mariñeiro ferido, non de gravidade.
Está previsto que os tripulantes do 'Mattheos I' permanezan 24 horas nese "porto seguro" para someterse aos recoñecementos médicos e, posteriormente, todos os mariñeiros, coa excepción dos de nacionalidade filipina, viaxarán en avión ata Madrid, dixo Campbell.
A portavoz de 'Mattheos I' estima que, se non hai contratempos, os tripulantes do petroleiro estarán en Madrid o vindeiro martes.
Os mariñeiros españois pasarán un tempo en España antes da súa reincorporación ao traballo no buque, que opera para distintas compañías, polo que cobre diferentes rutas en función dos intereses dos seus clientes, agregou.
O 'Mattheos I' foi asaltado o pasado 14 de setembro e liberado na mañá de onte, cando se atopaba a unhas 200 millas ao sueste de Lomé, capital de Togo, case enfronte das costas nixerianas.
A portavoz do petroleiro insistiu en que os piratas non esixiron un rescate, senón que o seu propósito era levar o gasóleo do barco, do que finalmente roubaron unhas 46.000 toneladas.
