O PSOE terá candidato para a presidencia do Goberno a finais do mes de novembro e para os comicios autonómicos e municipais en setembro, segundo o calendario e o regulamento de primarias que aprobou hoxe o Comité Federal do partido tras máis de sete horas de debate.
A idea do PSOE é que o proceso de primarias para as eleccións autonómicas e locais se inicie en xuño e culmine en setembro, mentres que o proceso para as xerais comezaría en outubro e acabaría coa votación a finais de novembro.
Algún membro da dirección aventurou que as primarias poderían celebrarse o 30 de novembro despois de que un Comité Federal abrise oficialmente o proceso o 4 de outubro.
No entanto, o Comité Federal delegou na Executiva a posibilidade de alterar o calendario das primarias autonómicas se así o solicitan as direccións rexionais e en función das súas circunstancias particulares.
De feito, o comité -no que só houbo dúas abstencións- deu o visto e prace ás primarias abertas no PSPV, á que están chamados os socialistas e simpatizantes valencianos o próximo 9 de marzo, no que serán a primeira experiencia do partido con este modelo de elección de candidatos.
Participar nas primarias abertas nas que se elixirá o candidato do PSOE á Moncloa custará 2 euros aos cidadáns que non sexan militantes e os interesados deberán inscribirse nun censo previo que estará aberto polo menos un mes, e pecharase seis días antes da votación.
A elaboración deste censo previo foi unha das principais críticas que esgrimiu unha das posibles candidatas que estaría mellor situada segundo as enquisas, Carme Chacón, que considera que entorpece unha participación masiva dos cidadáns.
Contestoulle a porta pechada o propio secretario xeral, Alfredo Pérez Rubalcaba, que dixo que el é o primeiro interesado en que as primarias "vaian ben" e en que a participación sexa a maior posible.
Nesta mesma liña, o secretario de Organización, Óscar López, xustificou ese censo previo na necesidade de evitar fraudes, "aluvións de última hora" ou "carrexo de votos" e defendeu que é un regulamento "moi consensuado", "traballado", "garantista" e "transparente".
Tal e como xa se adiantou, os precandidatos deberán recoller un mínimo dun 5 e un máximo dun 10 por cento de avais dos militantes do partido, apoios que incluso poderían recollerse de forma telemática.
Unha vez que haxa polo menos dous candidatos, abrirase o rexistro para que os cidadáns poidan apuntarse para votar nas primarias, previo pago desa cota simbólica de 2 euros, no caso das primarias abertas.
Durante a campaña, a "xunta electoral" do PSOE, formada por once militantes independentes e un representante de cada candidatura, garantirá que se desenvolva en condicións de igualdade, que poidan celebrarse debates entre os candidatos, e evitará irregularidades no financiamento das campañas.
Unha vez que o Comité Federal puxo data ás primarias, os dirixentes do PSOE coincidiron en que é o momento de expor unha alternativa seria ao PP e de gañar as próximas eleccións europeas de maio.
Trátase, en palabras do presidente asturiano, Javier Fernández, de evitar antes de tempo un "desfile de modelos" ou un "casting" de posibles candidatos.
Tamén a presidenta da Xunta de Andalucía, Susana Díaz, emprazou aos seus compañeiros a centrarse nas europeas para que sexan o comezo dunha "onda de cambio".
O propio Rubalcaba sostivo que España xógase" en boa medida a súa recuperación económica nos comicios europeos e fixo fincapé en que será a primeira vez que os cidadáns poderán dicir "non a Rajoy" e "pararlle os pés".
Boa proba do ambiente de unidade que presidiu a reunión é que só houbo dúas abstencións, a do expresidente castelán-manchego José María Barreda e a do dirixente de Esquerda Socialista Juan Antonio Barrio de Penagos.
Tampouco, unha vez máis, ningún dos posibles candidatos esfollou a margarida e avanzou se concorrerá ás primarias.
Chacón, por exemplo, limitouse a dicir que espera unha participación masiva para atopar á persoa "máis competente", mentres que Eduardo Madina ou Patxi López, responderon con evasivas e insistiron en que agora non toca.
Javier Fernández, que tamén soara nos últimos días, chanceou dicindo que iso é consecuencia de que ten "moitos amigos".
A crise no PSC
A maltreita situación do PSC protagonizou boa parte do interese do comité do partido. Xa na mañá deste sábado o partido manifestou de xeito oficial que a propia dirección do PSC debe xestionar a súa situación e defendeu o labor que está a facer o primeiro secretario deste partido, Pere Navarro, presente hoxe na cita.
