O ministro de Sanidade, Salvador Illa, insistiu este martes en que o confinamento domiciliario en España poderá evitarse se os cidadáns dan "cumprimento ás medidas" adoptadas por cada comunidade autónoma para frear a evolución do coronavirus.
Nunha entrevista en La hora de la 1 de TVE, recollida por Europa Press, o titular de Sanidade destacou, "con toda a prudencia do mundo", unha "relativa estabilización dos casos" nos últimos cinco días. "Estamos ao redor dos 530 casos por 100.000 habitantes. é un dato, dito con prudencia, de estabilización interesante", repetiu.
Nesta liña, e a pesar de que os datos de hospitalización e de falecidos "van con decalaje e rexistraron incrementos", Illa mostrouse optimista respecto das medidas adoptadas polos executivos autonómicos. Nalgúns territorios, como Andalucía, "haberá que esperar dúas semanas" para coñecer o impacto das disposicións que entran en vigor esta semana.
"Queremos ser rigorosos nisto e avaliar o resultado das medidas antes de tomar medidas máis drásticas que cremos que se se dá cumprimento ás medidas, podemos evitalo", apostilou.
Iso si, a pesar de non recorrer por agora ao confinamento domiciliario, o ministro deixou claro que o Nadal non será "igual que o ano anterior", aínda que o seu departamento intentará "que as familias se poidan reunir" e que a xente poida "celebrar actos relixiosos". "Imos ver como chegamos ao mes de decembro, pero imos ter que traballar conxuntamente para ver que recomendacións e medidas tomamos", resolveu.
