O secretario xeral de Podemos, Pablo Iglesias, advertiu este mércores de que tanto no Goberno central como nos concellos acabáronse os "cheques en branco" e avisou o socialista Pedro Sánchez: "Se vostede quere gobernar, vostede ten que negociar, ten que transixir".
Pablo Iglesias lanzou este aviso ao presidente do goberno en funcións, Pedro Sánchez, aínda que sen citalo, durante un mitin celebrado en Vigo con Rubén Pérez, Oriana Méndez, Xaquín Pastoriza e Estela Miller, os candidatos da Marea de Vigo ao Concello, gobernado en maioría absoluta polo socialista Abel Caballero.
O líder da formación morada, que quere conformar cos socialistas un goberno de coalición, asegurou que esta premisa "vai valer para o Estado" e tamén para os concellos. "Acabáronse as épocas do ordeno e mando e acabáronse as épocas das maiorías absolutas e os cheques en branco", dixo Pablo Iglesias, que considera que agora non se poden seguir facendo as cousas como se fixeron sempre, de xeito autoritario".
Aos multimillonarios moléstalles o Estado, moléstalles que alguén lles faga pagar impostos. eles non necesitan que haxa sanidade pública, poden pagar a privada
O líder de Podemos reiterou que non pedirá a lúa ao presidente en funcións pero si un programa de goberno que consista basicamente en garantir que en España a lei a cumpra "todo o mundo, non só a xente humilde".
Tras admitir que é consciente da forza que ten, o líder de Podemos insistiu na idea de que unha "maioría social" de españois quere que haxa un goberno de coalición progresista. "Estamos máis cerca que nunca de formar parte dun goberno de coalición no Estado, en moitos concellos e nalgunhas comunidades autónomas do noso país", subliñou Pablo Iglesias.
AMANCIO ORTEGA. En Galicia, onde reside o fundador de Inditex, pediu revisar o sistema fiscal para que "os que máis teñen" sexan os que máis impostos paguen e insistiu na idea de que a sanidade pública non debe depender de doazóns como a do xigante téxtil. "Aos multimillonarios moléstalles o Estado, moléstalles que alguén lles faga pagar impostos. eles non necesitan que haxa sanidade pública, poden pagar a privada", indicou o líder de Podemos, que o domingo avisou de que unha "democracia digna" non acepta esmolas do imperio de Amancio Ortega.
"É unha vergoña que neste país sexan os traballadores e os autónomos e incluso os parados a través de impostos indirectos os que teñen que asumir toda a carga fiscal", subliñou este mércores o líder de Podemos.
