O Consello de Ministros dará luz verde este venres ao recurso ante o Tribunal Constitucional da reprobación do Rei no Parlamento de Cataluña, segundo anunciou a vicepresidenta, Carmen Calvo, nos corredores do Congreso.
O Parlament aprobou o pasado 11 de setembro unha resolución que avogaba pola abolición da monarquía, cualificada de "inadmisible" polo presidente do Goberno, Pedro Sánchez, que ese mesmo día anunciou que tomaría medidas legais.
"Este venres proporemos un recurso ao TC, porque non se pode nun parlamento autonómico intentar trazar a forma de Estado deste país", sinalou a vicepresidenta. Calvo explicou que, aínda que a resolución que aprobou o Parlament, "non ten ningún sentido xurídico, si que ten que ter unha resposta política".
Nesa liña, apuntou que o Goberno vai con este asunto ao TC igual que foi hai dous meses "cando se intentou sen ningún efecto recompor as leis que rompían a Constitución e o propio Estatuto de Autonomía e a unidade territorial de España". Naquela ocasión, o Executivo recorreu ante o Constitucional —que pouco despois a suspendeu preventivamente— a moción aprobada o pasado 5 de xullo no Parlament que reafirma "os obxectivos políticos" da resolución do 9 de novembro de 2015 para avanzar cara á independencia de Cataluña.
O Goberno sostén que as súas actuacións respecto de Cataluña deben combinar a "naturalización" nas súas relacións coas respostas "firmes" e "responsables" ante as actuacións que considera "inaceptables" das institucións catalás, como o recente ultimato do president, Quim Torra, e a reprobación ao Rei. Por iso, Calvo admitiu que hai "momentos máis e menos agradables", pero insistiu en que o que non vai facer o Goberno de Sánchez é a "política da cadeira baleira".
Ante unha situación que "non é fácil", na que o Goberno está a pedir que "todo o mundo axude", a vicepresidenta lamentou que haxa partidos políticos que "non soamente non axudan, senón que procuran cada día empeorar as cousas".
